یواین آئی
نئی دہلی// وزیر دفاع راجناتھ سنگھ نے سول سرونٹس سے اپیل کی کہ وہ قومی مفاد میں فوجیوں کی طرح اپنی ذمہ داریاں ادا کریں۔ انہوں نے آپریشن سندور کی مثال دیتے ہوئے کہا کہ یہ ’’سول۔ملٹری ہم آہنگی‘‘ کی بہترین مثال ہے، جس میں انتظامی نظام نے آپریشن سے قبل عوام کو ’’مَوک ڈرل‘‘ کے ذریعے بیدار کر کے اہم کردار ادا کیا۔ سنگھ نے ہفتہ کے روز مسوری میں واقع لال بہادر شاستری نیشنل اکیڈمی آف ایڈمنسٹریشن میں 100ویں ’فاؤنڈیشن کورس‘ کی اختتامی تقریب سے خطاب کرتے ہوئے کہا کہ آپریشن سندور کے دوران ہندوستانی مسلح افواج نے پاکستان اور پاکستان کے زیر قبضہ کشمیر میں ملی ٹینٹ ٹھکانوں کو تباہ کیا۔ انہوں نے آپریشن سے پہلے انتظامیہ افسران کے کردار کی بھی تعریف کی اور کہا کہ انہوں نے اہم معلومات فراہم کرکے پورے ملک میں ’’موک ڈرل‘‘ کے کامیاب انعقاد کو یقینی بنایا۔انہوں نے کہا کہ ہندوستان کو 2047 تک ایک ترقی یافتہ ملک بنانے کے لیے حکمرانی کے نظام اور قومی سلامتی کے درمیان بہتر تال میل ضروری ہے۔ وزیر دفاع نے حکومت کے ’کم از کم حکومت، زیادہ سے زیادہ حکمرانی‘ اور ’اصلاح، کارکردگی اور تبدیلی‘ کے منتر کا حوالہ دیتے ہوئے کہا کہ خودکفیل اور ترقی یافتہ ہندوستان کے مقاصد کو تیزی سے حاصل کرنے میں سول سرونٹس کا اہم کردار ہے۔انہوں نے کہا کہ ’’2014 میں جب ہماری حکومت بنی تو معاشی سطح پر ہندوستان 11ویں مقام پر تھا۔ گزشتہ 9–10 برسوں میں ہم چوتھے مقام تک پہنچ گئے ہیں۔‘‘ آج معزز مالیاتی ادارے بھی کہہ رہے ہیں کہ اگلے دو تین برسوں میں ہندوستان تیسری سب سے بڑی معیشت بن سکتا ہے۔ آپ ’افلاطونی نگہبان‘ نہیں بلکہ عوام کے خادم ہیں۔ آپ کا کردار بے داغ اور رویّہ دیانت داری سے بھرپور ہونا چاہیے۔ انہوں نے افسروں سے ذمہ داری اور جوابدہی کے جذبے کے ساتھ کام کرنے کی اپیل کی۔ سنگھ نے نوجوان سول سرونٹس سے کہا کہ وہ ٹیکنالوجی کے اس دور میں جدت اختیار کرتے ہوئے عوام کے مسائل کے حل تلاش کریں۔وزیر دفاع نے سول سروسز میں خواتین کی بڑھتی ہوئی شمولیت کی بھی تعریف کی۔ انہوں نے کہا کہ سول سروسز کے گزشتہ امتحان میں ایک خاتون امیدوار نے پہلا مقام حاصل کیا اور پہلے پانچ میں سے تین مقامات خواتین کے پاس آئے۔ انہوں نے یقین ظاہر کیا کہ 2047 تک کئی خواتین کابینہ سکریٹری جیسے اعلیٰ عہدوں تک پہنچ کر ہندوستان کی ترقی کے سفر کو آگے بڑھائیں گی۔ سنگھ نے سابق وزیر اعظم لال بہادر شاستری اور سردار ولبھ بھائی پٹیل کو خراج عقیدت پیش کیا۔ انہوں نے اکیڈمی کے احاطے میں ’’ایک ضلع، ایک مصنوعات‘‘ پویلین کا بھی افتتاح کیا۔
