عظمیٰ نیوز ڈیسک
ممبئی// ایک بڑے فیصلے میں، آر بی آئی ( ریزرو بینک آف انڈیا)نے جمعہ کو ہسپتالوں اور تعلیمی اداروں کے لیے یو پی آئی(UPI) کی ادائیگی کی حد کو فی الحال ایک لاکھ روپے سے بڑھا کر 5 لاکھ روپے کرنے کا اعلان کیا ہے اور بار بار ہونے والی ادائیگیوں کے لیے ای مینڈیٹ کی حد کو بڑھا کر ایک لاکھ روپے کر دیا۔ دسمبر کی دو ماہی مانیٹری پالیسی کی اجرائی کرتے ہوئے، ریزرو بینک کے گورنر شکتی کانت داس نے کہا کہ یونیفائیڈ پیمنٹس انٹرفیس (UPI) لین دین کے مختلف زمروں کی حد کا وقتا فوقتا جائزہ لیا جاتا رہا ہے۔انہوں نے کہا، “اب ہسپتالوں اور تعلیمی اداروں کو ادائیگی کے لیے UPI ٹرانزیکشن کی حد کو 1 لاکھ روپے سے بڑھا کر 5 لاکھ روپے فی لین دین کرنے کی تجویز ہے۔”بڑھتی ہوئی حد سے صارفین کو تعلیم اور صحت کی دیکھ بھال کے مقاصد کے لیے زیادہ رقم کی UPI ادائیگی کرنے میں مدد ملے گی۔انہوں نے مزید کہا کہ بار بار چلنے والی ادائیگیوں کے لیے ای مینڈیٹ صارفین میں مقبول ہو گئے ہیں۔ای-مینڈیٹ فریم ورک کے تحت، فی الحال 15,000 روپے سے زیادہ کی بار بار چلنے والی لین دین کے لیے توثیق کا ایک اضافی عنصر (AFA) درکار ہے۔گورنر نے کہا، “اب یہ تجویز ہے کہ میوچل فنڈ سبسکرپشنز، انشورنس پریمیم سبسکرپشنز اور کریڈٹ کارڈ کی ادائیگیوں کی بار بار ہونے والی ادائیگیوں کے لیے اس حد کو 1 لاکھ روپے فی ٹرانزیکشن تک بڑھایا جائے،” ۔
