مشتاق الاسلام
پلوامہ//جموں و کشمیر کے زرعی اور باغبانی کے برآمد کنندگان کے ایک وفد نے مرکزی زراعت اور کسانوں کی بہبود کے وزیر شیوراج سنگھ چوہان کے ساتھ ملاقات کے دوران لاجسٹکس کے بڑھتے ہوئے اخراجات اور برآمدات سے متعلق چیلنجوں پر تشویش کا اظہار کیا۔جموں و کشمیر فروٹ اینڈ ویجی ٹیبل پروسیسنگ اینڈ انٹی گریٹڈ کولڈ چین ایسوسی ایشن (جے کے پی آئی سی سی اے) کے صدر بشیر احمد نائیک کی قیادت میں وفد نے ملک بھر کے برآمد کنندگان، خاص طور پر ایکسپورٹ پروموشن کیپٹل گڈز (ای پی سی جی) اسکیم کے تحت کام کرنے والے برآمد کنندگان کو متاثر کرنے والے مسائل پر وزیر کے ساتھ تفصیلی بات چیت کی۔
ایسوسی ایشن کی طرف سے جاری کردہ ایک بیان کے مطابق، ایسوسی ایشن نے ایک جامع نمائندگی پیش کی جس میں اہم چیلنجز کو اجاگر کیا گیا، بشمول فریٹ چارجز میں تیزی سے اضافہ جس میں متعدد غیر منظم ذیلی اخراجات کے نفاذ کے ساتھ 600 فیصد تک اضافہ ہونے کی اطلاع ہے۔ وفد نے عالمی ترقیات اور طریقہ کار کی پیچیدگیوں سے پیدا ہونے والی لاجسٹک رکاوٹوں کی طرف بھی اشارہ کیا جو برآمد کنندگان کی ای پی سی جی اسکیم کے تحت ذمہ داریوں کو پورا کرنے کی صلاحیت کو متاثر کرتی ہے۔بیان میں کہا گیا کہ مسائل، زرعی برآمدات کی عملداری کو نمایاں طور پر متاثر کر رہے ہیں، خاص طور پر کولڈ چین اور خراب ہونے والے سامان کے شعبوں میں، جہاں بروقت ترسیل اور لاگت کی کارکردگی اہم ہے۔مرکزی وزیر نے خدشات کو نوٹ کیا اور برآمد کنندگان پر ان کے اثرات کو تسلیم کیا ۔ انہوں نے وفد کو یقین دلایا کہ اس معاملے کو ترجیحی بنیادوں پر جانچا جائے گا اور ضروری پالیسی اور ریگولیٹری مداخلتوں پر غور کیا جائے گا۔
