عظمیٰ ویب ڈیسک

سری نگر//ایک تاریخی اقدام میں، یونین پبلک سروس کمیشن (یو پی ایس سی) نے جموں و کشمیر پولیس سروسز (جے کے پی ایس) کے 31 افسران کو انڈین پولیس سروسز (آئی پی ایس) میں شامل کرنے کو منظوری دی ہے۔
جموں و کشمیر کی تاریخ میں یہ پہلا موقع ہے کہ اتنی بڑی تعداد میں جے کے پی ایس افسران کو ایک ساتھ آئی پی ایس میں شامل کیا گیا ہے۔
یہ فیصلہ مبینہ طور پر نئی دہلی میں منعقدہ ایک اہم میٹنگ کے دوران کیا گیا، جس میں وزارت داخلہ (ایم ایچ اے)، چیف سکریٹری، اور ڈائریکٹر جنرل آف پولیس (ڈی جی پی) کے نمائندوں نے شرکت کی۔
ذرائع نے بتایا کہ 1999 بیچ کے 32 جے کے پی ایس افسران کو شامل کرنے کو منظوری دی گئی تھی، لیکن ایس ایس پی آر کے بھٹ ایک جاری انکوائری کی وجہ سے پچھلی میٹنگ میں شامل نہیں ہو پائے۔ نتیجتاً، 31 افسران انتخابی عمل کے ذریعے سرکاری طور پر آئی پی ایس کا حصہ بن گئے ہیں۔
افسران میں مقصود الزماں، مبشر لطیفی امیر، شیو کمار شرما، سہیل منور میر، رشمی وزیر، راجیشور سنگھ، سندیپ وزیر، انیتا شرما، سمیر ریکھی، جتندر سنگھ جوہر، اور 1999 بیچ کے دیگر افسران شامل ہیں۔