عظمیٰ ویب ڈیسک
سری نگر/منشیات کے خلاف جنگ کو جاری رکھتے ہوئے پولیس نے شمالی کشمیر کے سوپور میں 2 منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس پوسٹ وار پورہ کی ایک پارٹی نے ڈانگر پورہ میں ایک ناکے کے دوران دو مشکوک افراد کو روکا۔
انہوں نے کہا کہ تلاشی کے دوران ان کی تحویل سے 140 گرام چرس جیسا ممنوعہ مواد بر آمد کیا گیا جس کے بعد دنوں کی موقع پر ہی گرفتاری عمل میں لائی گئی۔
گرفتار شدگان کی شناخت فاروق احمد ڈار ولد غلام محمد ڈار اور ہلال احمد گنائی ولد فیاض احمد گنائی ساکنان ڈانگر پورہ سوپور کے طور پر ہوئی ہے۔
بیان میں کہا گیا کہ اس ضمن میں پولیس اسٹیشن سوپور میں این ڈی پی ایس کے متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔
پولیس ترجمان نے بتایا کہ سوپور پولیس معاشرے سے منشیات کی بیخ کنی کے لئے پر عزم ہے اور لوگوں سے اس سلسلے میں تعاون فراہم کرنے کی اپیل کرتی ہے۔
سوپور میں 2 منشیات فروش گرفتار، ممنوعہ مواد بر آمد: پولیس
