جموں و کشمیر سے تین نو منتخب راجیہ سبھا اراکین نے حلف اٹھایا

عظمیٰ ویب ڈیسک
سرینگر/جموں و کشمیر سے راجیہ سبھا کے تین نو منتخب اراکین نے پیر کو نائب صدرِ جمہوریہ سی پی رادھا کرشنن کے روبرو حلف لیا۔جموں و کشمیر راجیہ سبھا انتخابات میں کامیاب ہوئے نیشنل کانفرنس کے رہنما سجاد احمد کچلو نے سب سے پہلے حلف لیا۔ انہوں نے اپنی حلف برداری کے لیے اُردو زبان کا انتخاب کیا۔ ان کے بعد گُرویندر سنگھ اوبرائے، جو شمی اوبرائے کے نام سے بھی جانے جاتے ہیں، نے حلف لیا۔اوبرائے، جو کہ سکھ ہیں، نے پنجابی زبان میں حلف لیا۔ ان کے بعد چودھری محمد رمضان نے حلف اٹھایا۔
جموں و کشمیر سے ایک اور راجیہ سبھا رکن، ست شرما، اس سے قبل ہی نائب صدر کے روبرو حلف لے چکے تھے۔ ان اراکین کی حلف برداری کے ساتھ ہی جموں و کشمیر میں چار سال سے زیادہ کے وقفے کے بعد راجیہ سبھا میں نمائندگی بحال ہوگئی ہے۔مرکز کے زیر انتظام خطے کے سابقہ راجیہ سبھا اراکین غلام نبی آزاد، میر محمد فیاض، شمشیر سنگھ منہاس اور نذیر احمد لاوےفروری 2021 میں اپنی مدت پوری کر چکے تھے۔