عظمیٰ ویب ڈیسک

جموں// جموں و کشمیر کے نائب وزیر اعلیٰ سریندر چودھری نے ہفتہ کے روز کہا کہ حکمران نیشنل کانفرنس نے دہشت گردی کی وجہ سے سب سے زیادہ نقصان اٹھایا ہے اور وہ اس لعنت کے خاتمے کی خواہاں ہے تاکہ خطے میں امن قائم ہو سکے۔
این سی کی قیادت میں حکومت بننے کے بعد دہشت گردانہ حملوں میں اضافے کے سوال پر، انہوں نے جواب دیا، “اس طرح کے سوالات بار بار اٹھائے جا رہے ہیں، اور صرف ہم سے ہی کیوں؟”۔
انہوں نے کہا، “یہ حملے کافی عرصے سے ہو رہے ہیں اور پہلی بار نہیں ہو رہے۔ پچھلے 10 سالوں کا کیا؟ ہم نے حکومت 15 سے 20 دن پہلے ہی سنبھالی ہے۔ نیشنل کانفرنس کو سب سے زیادہ نقصان پہنچا ہے، کیونکہ اس کے کئی کارکن، رہنما، اور وزیر دہشت گردی کی بھینٹ چڑھ چکے ہیں”۔
نائب وزیر اعلیٰ نے کہا کہ نیشنل کانفرنس ملک میں کہیں بھی دہشت گردی کی سخت مذمت کرتی ہے۔ “ہم چاہتے ہیں کہ دہشت گردی ختم ہو تاکہ جموں و کشمیر میں امن قائم ہو سکے… ہمیں دہشت گردی کا خاتمہ کرنا ہوگا”۔
انہوں نے کہا، “ہم دہشت گردی کے خلاف ہیں اور بے گناہ جانوں کے نقصان پر افسوس کرتے ہیں۔ این سی کی قیادت، بشمول پارٹی صدر فاروق عبداللہ اور (وزیر اعلیٰ) عمر عبداللہ، نے کبھی بھی دہشت گردی کی حمایت نہیں کی”۔
ماتا ویشنو دیوی کے درشن کے لیے تریکوٹا پہاڑیوں پر مجوزہ روپ وے پروجیکٹ پر مقامی لوگوں کی ناراضگی کے سوال پر، چودھری نے کہا کہ یہ سوال بی جے پی کے اس حلقہ کے ایم ایل اے سے پوچھا جانا چاہیے، جن کی پارٹی یہ دعویٰ کر رہی ہے کہ ایل جی ان سے تعلق رکھتے ہیں اور وہی اس پروجیکٹ کی منظوری دینے والے ہیں۔
انہوں نے مزید کہا، “ہم اس پروجیکٹ کا جائزہ لیں گے اور مقامی اسٹیک ہولڈرز پر اس کے اثرات کا پتہ لگانے کی کوشش کریں گے”۔