کشمیری طلباء اور تاجروں کو کھلے عام دھمکیاں :وزیر داخلہ سے مداخلت کرنے کی درخواست کی : محبوبہ

عظمیٰ ویب ڈیسک
سری نگر/پی ڈی پی صدر اور سابق وزیر اعلیٰ محبوبہ مفتی نے پہلگام حملے کے سوگوار خاندانوں کے ساتھ اظہار یکجہتی کرتے ہوئے کہا ہے کہ مصیبت کی اس گھڑی میں ہم قوم کے ساتھ کھڑے ہیں۔انہوں نے وزیر داخلہ امیت شاہ سے کچھ عناصر کی طرف سے مختلف ریاستوں میں کشمیری طلباء اور تاجروں کو دھمکیاں دینے کے تناظر میں مداخلت کرنے کی درخواست کی ہے۔
موصوف صدر نے جمعرات کی صبح ایکس پر اپنے ایک پوسٹ میں کہامیں نے پہلگام حملے کے سوگوار خاندانوں کے ساتھ اظہار یکجہتی کرنے کے لئے وزیر داخلہ امیت شاہ سے بات کی۔انہوں نے کہامصیبت کی اس گھڑی میں ہم قوم کے ساتھ کھڑے ہیں۔
محبوبہ مفتی نے کہاکچھ عناصر کی طرف سے مختلف ریاستوں میں کشمیری طلباء اور تاجروں کو کھلے عام دھمکیاں دینے کے تناظر میں ان (وزیر داخلہ) سے مداخلت کرنے کی بھی درخواست کی۔انہوں نے کہا میں نے ان سے اپیل کی کہ وہ بلا تاخیر مداخلت کریں تاکہ ان (کشمیری طلبا و تاجروں) کی حفاظت اور تحفظ کو یقینی بنایا جا سکے جہاں بھی اس طرح کے واقعات رپورٹ ہو رہے ہیں۔
واضح رہے کہ منگل کے روز سیاحتی مقام پہلگام کی بیسرن ویلی میں ملی ٹینٹوںنے سیاحوں کے ایک گروہ کو نشانہ بنایا تھا، جس کے نتیجے میں 26 افراد جاں بحق اور کم از کم 10 زخمی ہو گئے تھے۔ اس سانحے کے خلاف بطور احتجاج کشمیر میں بدھ کے روز مکمل بند رہا اور لوگوں نے احتجاج درج کیا۔