نئی دہلی// اڈانی معاملے کی جے پی سی جانچ کے مطالبہ پر اپوزیشن کے ہنگامے کے درمیان، لوک سبھا نے منگل کو مرکزی زیر انتظام جموں و کشمیر کے لیے مالی سال 2023-24 کے لیے 1.118 لاکھ کروڑ روپے کا بجٹ منظور کیا۔
تفصیلات کے مطابق، جیسے ہی بعد دوپہر 2 بجے ایوان کا دوبارہ اجلاس ہوا، راجندرا اگروال، جو کارروائی کی صدارت کر رہے تھے، نے بی جے پی کے جگل کشور شرما سے کہا کہ وہ مرکز کے زیر انتظام علاقے جموں وکشمیر کے بجٹ پر بحث شروع کریں، جو اس وقت مرکزی حکومت کے تحت ہے۔
جگل کشور شرما نے ایک منٹ تک بات کی جس کے بعد بجٹ پاس کرنے کا عمل شروع کیا گیا۔
جموں و کشمیر کا بجٹ ہنگامہ آرائی کے درمیان وائس ووٹ سے منظور کیا گیا۔
تفصیلات کے مطابق، جیسے ہی ایوان زیریں کا اجلاس دوپہر 2 بجے بلایا گیا، راجندر اگروال، جو چیئر پر موجود تھے، نے کاغذات رکھنے کی اجازت دی۔تاہم جیسے ہی اگروال نے جموں و کشمیر کے بجٹ پر بحث شروع کرنے کا عمل شروع کیا، کانگریس کی قیادت میں حزب اختلاف کے ارکان اڈانی معاملے میں جے پی سی کی تحقیقات کا مطالبہ کرتے ہوئے نعرے لگاتے ہوئے ایوان کے ویل میں پہنچ گئے۔
ٹی ایم سی کے ارکان خاموشی سے اپنی نشستوں پر بیٹھ گئے، دوسری اپوزیشن پارٹیاں جیسے جے ڈی یو، سماج وادی پارٹی اور این سی پی کے ارکان بھی احتجاج میں اپنی نشستوں کے قریب کھڑے ہوگئے۔بعد میں جے ڈی یو کے ارکان بھی احتجاج میں شامل ہو گئے۔
جموں و کشمیر کے بجٹ پر صرف جموں سے بی جے پی کے ایم پی، جگل کشور شرما کو بولنے کی اجازت دینے کے بعد وائس ووٹ سے بجٹ کو منظور کیا گیا۔
جموں و کشمیر کے بجٹ کی منظوری کے فوراً بعد، بی جے پی کے ارکان بھی اپنی نشستوں سے اٹھے اور نعرے لگانے لگے، اور راہول گاندھی سے جمہوریت پر اپنے تبصرے کے لیے معافی مانگنے لگے۔ہنگامہ آرائی کے درمیان اگروال نے ایوان کی کارروائی جمعرات تک ملتوی کر دی۔
