بڈگام میں منشیات فروش گرفتار، ممنوعہ مواد بر آمد: پولیس

عظمیٰ ویب ڈیسک
سری نگر/منشیات کے خلاف جنگ کو جاری رکھتے ہوئے پولیس نے وسطی کشمیر کے ضلع بڈگام کے سویہ بگ علاقے سے ایک منشیات فروش کو گرفتار کرکے اس کی تحویل سے ممنوعہ مواد بر آمد کیا ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس پوسٹ سویہ بگ کی ایک پارٹی نے ہرن گائوں میں ایک ناکے کے دوران ایک شخص کو تلاشی کے لئے روکا جس نے پولیس کو دیکھتے ہی فرار ہونے کی کوشش کی لیکن کو اس دھر لیا گیا۔انہوں نے کہا کہ تلاشی کے دوران اس کی تحویل سے چرس جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت سمیر احمد بیگ ولد غلام حسن بیگ ساکن چک سویہ بگ کے طور پر کی گئی ہے۔بیان میں کہا گیا کہ پولیس نے اس ضمن میں پولیس اسٹیشن بڈگام میں متعلقہ دفعات کے تحت ایک کیس درج کرکے مزید تحقیقات شروع کی ہیں۔ترجمان نے بتایا کہ بڈگام پولیس عوام کے تعاون سے منشیات کی بیخ کنی کو یقینی بنانے کے لئے پر عزم ہے۔