سی آر پی ایف سربراہ کا کشمیر کی سکیورٹی کا جائزہ، امرناتھ یاترا کے پرامن انعقاد کے لیے پیشگی حفاظتی اقدامات پر زور

عظمیٰ ویب ڈیسک
سری نگر/مرکزی ریزرو پولیس فورس (سی آر پی ایف) کے ڈائریکٹر جنرل گیانیندر پرتاپ سنگھ نے جمعرات کو آئندہ ماہ شروع ہونے والی شری امرناتھ جی یاترا کے محفوظ، پُرامن اور کامیاب انعقاد کو یقینی بنانے کے لیے پیشگی حفاظتی اقدامات کی ضرورت پر زور دیا۔وادیٔ کشمیر کے اپنے تین روزہ دورے کے تیسرے اور آخری دن سی آر پی ایف سربراہ نے گروپ سینٹر (جی سی) سری نگر میں سینئر افسران اور زمینی سطح کے کمانڈروں کے ساتھ ایک اعلیٰ سطحی سکیورٹی جائزہ اجلاس کی صدارت کی۔
سی آر پی ایف کے ترجمان کے مطابق ڈائریکٹر جنرل نے وادی کی مجموعی سکیورٹی صورتحال کا جائزہ لیا اور محفوظ اور کسی بھی ناخوشگوار واقعے سے پاک یاترا کو یقینی بنانے کے لیے مسلسل چوکس رہنے کی ہدایت دی۔اجلاس میں کشمیر میں معمول کی زندگی برقرار رکھنے، عسکریت مخالف کارروائیوں کو مزید مؤثر بنانے اور یاترا کے راستوں سمیت دیگر حساس مقامات پر سکیورٹی انتظامات کو مضبوط کرنے پر تفصیلی غور کیا گیا۔
اپنے تین روزہ دورے کے دوران سنگھ نے بالتال بیس کیمپ کا بھی دورہ کیا، جہاں انہوں نے سالانہ یاترا کے لیے تیاریوں اور حفاظتی انتظامات کا جائزہ لیا۔ انہوں نے زمینی سطح کے کمانڈروں، اہلکاروں اور دیگر متعلقہ فریقوں سے ملاقات کی اور سکیورٹی عملے کو انتہائی چوکسی، ذمہ داری اور پیشہ ورانہ انداز میں فرائض انجام دینے کی ہدایت دی۔امرناتھ یاترا کی سکیورٹی کے لیے جموں و کشمیر پولیس اور مرکزی مسلح پولیس فورسز کے ساتھ تقریباً 50 ہزار سی آر پی ایف اہلکار تعینات کیے جائیں گے۔امرناتھ یاترا 3 جولائی سے شروع ہوگی اور 28 اگست کو اختتام پذیر ہوگی۔ اس دوران جموں و کشمیر بھر میں کثیر سطحی حفاظتی انتظامات نافذ رہیں گے۔