عظمیٰ نیوز سروس
سرینگر// منتخب حکومت کی ناکامیوں پر اسے ہدفِ تنقید بناتے ہوئے اپنی پارٹی کے سربراہ سید محمد الطاف بخاری نے کہا کہ ’’عوام بے شمار مسائل اور مشکلات کا سامنا کر رہے ہیں، لیکن حکومت ان مسائل کے حل کے لیے سنجیدگی کا مظاہرہ کرتی نظر نہیں آتی۔‘‘انہوں نے یہ بات کل سرینگر میں پارٹی صدر دفتر پر منعقدہ ایک تقریب سے خطاب کرتے ہوئے کہی۔ یہ تقریب شمالی کشمیر کے بارہمولہ اور سوپور سے تعلق رکھنے والے سماجی اور سیاسی کارکنوں کی ایک بڑی تعداد کو پارٹی میں خوش آمدید کہنے کے لیے منعقد کی گئی تھی۔ اس موقعے پر الطاف بخاری نے جموں و کشمیر کے عوام کو درپیش سنگین مسائل اور خدشات کو اجاگر کیا اور ان مسائل کے حل میں ناکامی پر حکومت کو ذمہ دار ٹھہرایا۔
انہوں نے کہا، ’’پچاس سے زائد ارکانِ اسمبلی رکھنے والی منتخب حکومت عوامی مسائل اور شکایات کا ازالہ کرنے کے تئیں بالکل غیر سنجیدہ دکھائی دیتی ہے۔انہوں نے مزید کہا، ’’یہ حکومت کئی علاقوں میں لوگوں کو آبپاشی اور پینے کے پانی کی مناسب فراہمی یقینی بنانے میں بھی ناکام رہی ہے۔ بجلی کے بقایا بلوں کے بوجھ کے حوالے سے بھی اس نے کوئی سنجیدہ توجہ نہیں دی، حالانکہ بے شمار غریب خاندان ان بلوں کی ادائیگی کے لیے جدوجہد کر رہے ہیں۔ نتیجتاً وہ شدید مشکلات کا شکار ہیں۔ بڑی تعداد میں لوگ جیلوں میں بند ہیں اور ان کے اہلِ خانہ ان کی واپسی کے منتظر ہیں، لیکن حکومت اس مسئلے پر بات کرنا بھی ضروری نہیں سمجھتی۔‘بخاری نے کہا، ’’ہمارے تعلیمی اور طبی ادارے عملے اور بنیادی ڈھانچے اور پیشہ ور افرادی قوت کی کمی کا شکار ہیں، اور ان مسائل کے حل کے لیے ایک بھی مؤثر قدم نہیں اٹھایا جا رہا۔‘‘انہوں نے مزید کہا، ’’افسوس ناک بات یہ ہے کہ آیوشمان بھارت۔صحت اسکیم اسپتالوں کو ادائیگیاں نہ ہونے کے باعث ناکامی سے دوچار ہو رہی ہے۔ متعدد نجی اسپتالوں اور ڈائلیسس مراکز نے اس اسکیم کے تحت علاج فراہم کرنا بند کر دیا ہے، لیکن ہماری حکومت اس اہم مسئلے کے حوالے سے بھی بے حس بنی ہوئی ہے۔‘‘بارہمولہ سے اپنی پارٹی میں شامل ہونے والوں میں ممتاز ماہرِ تعلیم خورشید احمد بٹ، امتیاز احمد ڈار، ساحل صوفی، شفقت حسن، صہیب حسن، خورشید احمد لون، بلال احمد بٹ، مدثر احمد، عبدالرقیب، شبیر احمد، ہلال احمد اور دیگر کئی افراد شامل ہیں۔سوپور حلقے سے پارٹی میں شامل ہونے والوں میں محمد اقبال وانی (سابق ضلع یوتھ کنوینر، عوامی اتحاد پارٹی)، بلال احمد بٹ (سابق حلقہ صدر عوامی اتحاد پارٹی ، آدی پورہ)، توصیف الحسن مرازی اور دیگر کئی افراد شامل ہیں۔
