عظمیٰ نیوز سروس
پونچھ//ضلع پولیس پونچھ نے ایک اہم کامیابی حاصل کرتے ہوئے گمشدہ اور چوری شدہ پچاس موبائل فون، جن کی مالیت آٹھ لاکھ روپے سے زائد بتائی جا رہی ہے، برآمد کرکے ان کے اصل مالکان کے حوالے کر دیے۔ اس سلسلے میں ضلع پولیس دفتر پونچھ میں ایک خصوصی تقریب کا انعقاد کیا گیا جہاں برآمد شدہ موبائل فون متعلقہ افراد کو واپس کیے گئے۔یہ موبائل فون سینئر سپرنٹنڈنٹ آف پولیس (ایس ایس پی) پونچھ شفقت حسین نے دیگر پولیس افسران کی موجودگی میں مالکان کے حوالے کیے۔ اس موقع پر پولیس حکام نے کہا کہ ضلع پولیس جدید ٹیکنالوجی کے استعمال کے ذریعے عوامی مسائل کے حل اور جرائم کی روک تھام کے لیے مسلسل اقدامات کر رہی ہے۔
پولیس کے مطابق یہ تمام موبائل فون سائبر پولیس اسٹیشن پونچھ کی جانب سے مسلسل تکنیکی تحقیقات اور مربوط کارروائیوں کے دوران برآمد کیے گئے۔ شہریوں کی جانب سے موبائل فون گم ہونے یا چوری ہونے کی شکایات موصول ہونے کے بعد سائبر ٹیم نے جدید ٹریکنگ سسٹم، تکنیکی نگرانی اور ٹیلی کام سروس فراہم کرنے والی کمپنیوں کے تعاون سے مختلف مقامات پر کارروائیاں انجام دیں۔پولیس حکام نے بتایا کہ جدید ٹیکنالوجی اور سی ای آئی آر نظام کی مدد سے موبائل فونز کی لوکیشن کا پتہ لگایا گیا، جس کے بعد انہیں مختلف علاقوں سے برآمد کیا گیا۔ تمام قانونی تقاضے اور تصدیقی عمل مکمل کرنے کے بعد موبائل فون ان کے اصل مالکان کے حوالے کیے گئے۔موبائل فون واپس حاصل کرنے والے افراد نے ضلع پولیس پونچھ، خصوصاً سائبر پولیس اسٹیشن کی فوری اور پیشہ ورانہ کارروائیوں کو سراہتے ہوئے شکریہ ادا کیا۔ شہریوں کا کہنا تھا کہ پولیس کی اس کوشش سے عوام کا اعتماد مزید مضبوط ہوا ہے۔اس موقع پر ایس ایس پی پونچھ شفقت حسین نے عوام سے اپیل کی کہ اگر کسی کا موبائل فون گم ہو جائے یا چوری ہو جائے تو وہ فوری طور پر نزدیکی پولیس اسٹیشن میں رپورٹ درج کروائیں اور سی ای آئی آر پورٹل پر بھی شکایت درج کریں تاکہ بروقت کارروائی ممکن بنائی جا سکے اور موبائل فون کی برآمدگی کے امکانات بڑھ سکیں۔انہوں نے کہا کہ ضلع پولیس پونچھ عوام دوست پولیسنگ اور جدید ٹیکنالوجی کے مؤثر استعمال کے ذریعے عوامی خدمات کو مزید بہتر بنانے کے لیے پرعزم ہے۔
