سرینگر// علیل والد کی عیادت کیلئے دس روزہ عبوری ضمانت پر رہا بارہمولہ کے ممبر پارلیمنٹ انجینئر رشید نے ضمانت کے حکم میں ترمیم کیلئے دہلی ہائی کورٹ سے رجوع کر لیا۔ انجینئر رشید نے دہلی ہائی کورٹ سے اپیل کی کہ انہیں ایک ہفتے کی عبوری ضمانت دینے کے اپنے پہلے کے حکم میں ترمیم کرے اور انہیں اپنے بیمار والد کے ساتھ رہنے کی اجازت دے، جنہیں سری نگر سے ایمز دہلی منتقل کیا گیا ہے۔جسٹس پرتھیبا ایم سنگھ اور مدھو جین کی بنچ، جس نے بارہمولہ کے رکن پارلیمنٹ کو ان کی عبوری ضمانت کی مدت کیلئے سرینگر تک محدود رکھا تھا، نے اس معاملے کو منگل کو سماعت کے لیے درج کیا اور ان سے مقامی پتہ پیش کرنے کو کہا۔رشید کے سینئر وکیل نے کہاکہ ان کا دہلی میں ایک فلیٹ ہے، جو انہیں بطور رکن پارلیمنٹ الاٹ کیا گیا ہے۔
تاہم عدالت نے مشاہدہ کیا کہ وہ رشید کو ایسی جگہ پر رہنے کی اجازت نہیں دے گی جہاں دیگر ارکان پارلیمنٹ بھی رہتے ہیں۔خیال رہے کہ قومی تحقیقاتی ایجنسی ( این آئی اے ) کے وکیل نے عرض کیا کہ چونکہ عدالت نے اس معاملے میں حراست میں پیرول کو مؤثر طریقے سے منظور کر لیا ہے اور رشید کو اب دہلی سے باہر رہنے کی ضرورت نہیں ہے، اس لیے اسے جیل سے ہی اپنے والد سے ملنے کی اجازت دی جائے، خاص طور پر جب عبوری ضمانت کی مدت 6 مئی کو ختم ہو رہی تھی۔حراستی پیرول میں ایک قیدی کو مسلح پولیس اہلکاروں کے ذریعے اس کے دورے کی جگہ پر لے جانا شامل ہوتا ہے۔
