عظمیٰ نیوز سروس
سرینگر//پیپلز ڈیموکریٹک پارٹی کی صدرمحبوبہ مفتی نے اتوار کے روز کہا کہ امریکہ اور ایران کے درمیان مذاکرات کو ناکامی کے طور پر نہیں دیکھا جانا چاہئے، انہوں نے مذاکرات کو ایک پیچیدہ اور دیرینہ عمل قرار دیتے ہوئے کہا کہ اس کے نتائج برآمد ہونے میں وقت درکار ہے۔ چندگام پلوامہ میں پارٹی کو نچلی سطح پر مضبوط کرنے اور آنے والے پنچایتی اور یو ایل بی انتخابات کے لیے تیاریاں کرنے کے لیے ورکرز کانفرنس سے خطاب کرتے ہوئے انہوںنے کہا کہ دونوں ممالک کے درمیان بات چیت “کئی سالوں سے پھنسی ہوئی ہے” اور فوری نتائج کی توقع کرنے سے خبردار کیا گیا۔ انہوں نے زور دے کر کہا کہ اس طرح کے پیمانے اور حساسیت کے مذاکرات راتوں رات حل نہیں ہو سکتے۔مفتی کا مزید کہنا تھا کہ مذاکرات سے جلد نتائج کی توقع رکھنا غیر حقیقی ہوگا۔ “اگر آپ کو لگتا ہے کہ اسے ایک رات میں کامیاب ہونا چاہیے، تو آپ غلط ہیں،” انہوں نے اس امید کا اظہار کرتے ہوئے کہا کہ مذاکرات کے آخر کار مثبت نتائج برآمد ہو سکتے ہیں۔محبوبہ مفتی نے کہا کہ اگرچہ امریکہ کو فوری فوائد حاصل نہیں ہوئے ہیں، لیکن بات چیت کا تسلسل خود اہم ہے۔محبوبہ مفتی نے عمر عبداللہ کی قیادت والی حکومت پر تنقید کرتے ہوئے کہا کہ حکومت اسرائیل کے راستے پر چل رہی ہے۔ انہوں نے کہا کہ نہ تو عمر عبداللہ کی قیادت والی حکومت اور نہ ہی بی جے پی کی قیادت والی مرکزی حکومت نے ایران میں بے گناہوں کے قتل کی مذمت کی۔کانفرنس میں ایم ایل اے پلوامہ وحید الرحمن پرہ، ایم ایل اے ترال رفیق احمد نائیک، التجا مفتی اور پارٹی کے دیگر سینئر لیڈران پارٹی صدر کے ہمراہ موجود تھے۔ اس موقع پر پارٹی قیادت کے علاوہ پارٹی کے سینئر لیڈران نے خطاب کیا جبکہ اس موقع پر سبھی لیڈران نے نیشنل کانفرنس کو تنقید کا نشانہ بناتے ہوئے کہا کہ وہ عوام کے ساتھ کئے گئے وعدوں کو پورا کریں۔
