عظمیٰ نیوز سروس
راجستھان// راجستھان کی میواڑ یونیورسٹی میں زیر تعلیم17کشمیری نرسنگ طلبا کو ان کے نرسنگ پروگرام کی شناخت کی حیثیت سے متعلق تنازعہ کے بعد چتور گڑھ کی سب ڈسٹرکٹ جیل میں دو دن گزارنے کے بعد بدھ کو رہا کر دیا گیا۔طلبا کو اس وقت حراست میں لیا گیا تھا جب کیمپس میں اس الزام پر کشیدگی بڑھ گئی تھی کہ بی ایس سی یونیورسٹی کے ذریعہ پیش کردہ نرسنگ کورس کو راجستھان نرسنگ کونسل سے منظوری حاصل نہیں تھی۔اس پیشرفت نے پروگرام میں داخلہ لینے والے متعدد طلبا کے تعلیمی مستقبل کے بارے میں تشویش پیدا کردی ہے، جن میں سے اکثر اس وقت اپنی تعلیم کے آخری سال میں ہیں۔طلبا کے مطابق، انہوں نے نرسنگ پروگرام میں داخلہ 2022-23 کے تعلیمی سیشن کے دوران جموں و کشمیر سپیشل سکالرشپ سکیم کے تحت لیا تھا۔
طالب علموں نے الزام لگایا کہ یونیورسٹی کے ذریعہ چلائے جانے والے کورس کو راجستھان نرسنگ کونسل سے لازمی منظوری نہیں ملی تھی۔یہ مسئلہ مبینہ طور پر اس وقت سامنے آیا جب طلبا نے ذاتی طور پر راجستھان نرسنگ کونسل کا دورہ کیا اور اپنے کورس کی منظوری کی حیثیت کے بارے میں وضاحت طلب کی۔طلبا نے دعویٰ کیا کہ عہدیداروں نے انہیں بتایا کہ یونیورسٹی سے نرسنگ پروگرام کی منظوری سے متعلق کوئی درخواست یا فائل زیر غور نہیں ہے۔طلبا نے کہا کہ اس پیشرفت نے ان کے تعلیمی مستقبل کو غیر یقینی صورتحال میں ڈال دیا ہے، خاص طور پر ان میں سے کئی اپنے ڈگری پروگرام کی تکمیل کے قریب ہیں۔طلبا نے حکام سے اپیل کی ہے کہ وہ کسی تسلیم شدہ اور منظور شدہ نرسنگ ادارے میں ان کی منتقلی کی سہولت فراہم کریں تاکہ ان کی تعلیم مزید رکاوٹ کے بغیر جاری رہ سکے۔
