عظمیٰ نیوز سروس
راجوری//ضلع راجوری کے علاقے نیلی میں فوج کی جانب سے نوجوانوں کو مسلح افواج میں شمولیت کی ترغیب دینے کے مقصد سے ایک حوصلہ افزا لیکچر کا انعقاد کیا گیا، جس میں مقامی طلبہ اور عوام نے بھرپور شرکت کی۔ پروگرام کا مقصد نوجوان نسل کو بھارتی فوج، بحریہ اور فضائیہ میں دستیاب کیریئر مواقع کے بارے میں آگاہی فراہم کرنا تھا۔
اس موقع پرفوج کے ایک نمائندے نے خطاب کرتے ہوئے سپاہی کے پیشے کو ایک باوقار اور عظیم خدمت قرار دیا۔ انہوں نے وطن سے محبت، نظم و ضبط، قیادت کی صلاحیت اور بے لوث خدمت جیسے اوصاف کو فوجی زندگی کی بنیاد قرار دیتے ہوئے نوجوانوں کو ملک کی خدمت کے لئے آگے آنے کی ترغیب دی۔لیکچر کے دوران مسلح افواج میں داخلے کے مختلف طریقوں، اہلیت کے معیار، انتخابی مراحل اور تعلیمی قابلیت کے ساتھ جسمانی فٹنس کی اہمیت پر تفصیلی روشنی ڈالی گئی۔ شرکاء کو بتایا گیا کہ بھرتی ریلیوں، تحریری امتحانات اور سروس سلیکشن بورڈ (ایس ایس بی) انٹرویوز کے ذریعے امیدواروں کا انتخاب کیا جاتا ہے، جس کے لئے محنت، لگن اور مناسب تیاری ضروری ہے۔پروگرام کے دوران ایک انٹرایکٹو سیشن بھی منعقد ہوا جس میں طلباء نے بھرتی کے عمل، کیریئر میں ترقی کے امکانات اور فوجی زندگی سے متعلق مختلف سوالات کئے جن کے تسلی بخش جوابات فراہم کئے گئے۔ فوجی اہلکاروں نے اپنی عملی زندگی کے تجربات بھی شیئر کئے جس سے نوجوانوں میں جوش و خروش پیدا ہوا اور انہیں ایک باوقار مستقبل کے لیے مسلح افواج کا رخ کرنے کی ترغیب ملی۔اس تقریب میں مجموعی طور پر 187 افراد نے شرکت کی جن میں 182 طلبہ اور 5 اساتذہ شامل تھے۔ مقامی لوگوں نے اس اقدام کو سراہتے ہوئے کہا کہ اس طرح کے پروگرام نوجوانوں کی رہنمائی اور مثبت سمت میں ان کی حوصلہ افزائی کے لیے نہایت مفید ثابت ہوتے ہیں۔
