عظمیٰ نیوز سروس
جموں// جموں و کشمیر حکومت نے جمعرات کو کہا کہ اس نے مالی سال 2024-25 میں 133 لگژری گاڑیاں خریدی ہیں اور اس عمل میں معیار کی کمی کو مسترد کرتے ہوئے اس بات کو برقرار رکھا کہ سرکاری گاڑیوں کی خریداری سختی سے مقررہ اصولوں کے مطابق تھی۔ رنبیر سنگھ پٹھانیا کے ایک سوال کے تحریری جواب میں، ٹرانسپورٹ کے وزیر ستیش شرما نے کہا کہ ریاستی موٹر گیراج ڈیپارٹمنٹ نے 2024-25 میں 133 لگژری گاڑیاں اور مالی سال 2023-24 میں 10گاڑیاں خریدیں۔انہوں نے کہا کہ مختلف محکموں اور پبلک سیکٹر انڈرٹیکنگز (PSUs) کے ذریعہ گاڑیوں کی خریداری میں اصولوں سے کوئی انحراف نہیں کیا گیا ہے۔تاہم، وزیر نے مزید کہا کہ بعض صورتوں میں، حکومت کی طرف سے مشکل علاقوں، آپریشنل ضروریات اور سرکاری فرائض کی نوعیت کو مدنظر رکھتے ہوئے، مقررہ اصولوں میں نرمی کے ذریعے اعلیٰ درجے کی گاڑیوں کی خریداری کی اجازت دی گئی ہے۔حکومت نے اس دعوے کو بھی مسترد کر دیا کہ ایک مقررہ میک یا ماڈل کی عدم موجودگی نے سرکاری خزانے پر اضافی بوجھ ڈالا ہے۔انہوں نے مزید کہا کہ سپیئر پارٹس جنرل فنانشل رولز (GFR) کے مطابق خریدے گئے تھے۔
