برفباری سے نظام متاثر ،محکمہ بجلی کی سست روی پر شہریوں کا شدید غم و غصہ
راجوری//راجوری ضلع کی کوٹرنکہ سب ڈویژن کے دور افتادہ قصبہ بدھل میں ایک ہفتے سے جاری بجلی بندش کے خلاف عوام کا غصہ پھوٹ پڑا اور نصف شب کے وقت زبردست احتجاج کیا گیا۔ مقامی لوگوں نے طویل عرصہ سے بجلی بحال نہ ہونے پر شدید ناراضگی کا اظہار کرتے ہوئے سڑکوں پر نکل کر پاور ڈیولپمنٹ ڈیپارٹمنٹ (پی ڈی ڈی) کے خلاف نعرے بازی کی۔مقامی باشندوں کے مطابق 22 جنوری کی رات شدید برفباری کے باعث بجلی کے بنیادی ڈھانچے کو نقصان پہنچا تھا، جس کے بعد علاقے میں بجلی کی سپلائی مکمل طور پر معطل ہو گئی۔ کئی دن گزرنے کے باوجود محکمہ بجلی تمام علاقوں میں بجلی بحال کرنے میں ناکام رہا ہے، جس کی وجہ سے انسانی آبادیاں اندھیرے میں ڈوبی ہوئی ہیں۔شہریوں کا کہنا ہے کہ مسلسل بجلی بند رہنے سے روزمرہ زندگی بری طرح متاثر ہو چکی ہے اور معمولات زندگی مکمل طور پر مفلوج ہو کر رہ گئے ہیں۔
گھریلو صارفین، طلبہ، مریض اور دیگر ضروری خدمات شدید مشکلات سے دوچار ہیں، خاص طور پر سخت سردی کے موسم میں بجلی نہ ہونے سے مسائل کئی گنا بڑھ گئے ہیں۔مظاہرین نے بتایا کہ بارہا متعلقہ حکام کو اس مسئلے سے آگاہ کیا گیا، مگر کوئی خاطر خواہ اقدام نہیں اٹھایا گیا۔ حکام کی مبینہ غفلت اور سست روی کے خلاف مقامی نوجوان رات گئے سڑکوں پر نکل آئے اور احتجاجی مظاہرہ کیا۔احتجاج کے دوران مظاہرین نے مطالبہ کیا کہ بجلی کی سپلائی فوری طور پر بحال کی جائے اور متاثرہ ڈھانچے کی مرمت میں تیزی لائی جائے۔ انہوں نے انتظامیہ سے اپیل کی کہ مسئلے کو سنجیدگی سے لیا جائے تاکہ عوام کو مزید مشکلات کا سامنا نہ کرنا پڑے۔مظاہرین نے خبردار کیا کہ اگر جلد بجلی بحال نہ کی گئی تو وہ آنے والے دنوں میں اپنے احتجاج کو مزید وسعت دیں گے۔ انہوں نے امید ظاہر کی کہ ضلعی انتظامیہ فوری نوٹس لے کر مسئلہ حل کرے گی تاکہ بڈھال کے عوام کو اندھیرے اور شدید سردی میں مزید پریشانی نہ اٹھانی پڑے۔
