یو این آئی
ریاض /سعودی پرو لیگ کے اہم میچ میں النصر نے التعاون کو سخت مقابلے کے بعد 0-1 سے شکست دے کر خطاب کی دوڑ میں اپنی پوزیشن مزید مستحکم کر لی ہے ۔ اس جیت کے ساتھ النصر نے ٹیبل پر پہلے نمبر پر موجود الہلال اور اپنے درمیان پوائنٹس کا فرق کم کر کے صرف 5 کر دیا ہے ۔الاول پارک میں کھیلے گئے اس میچ میں النصر نے شروع سے ہی کھیل پر غلبہ حاصل کیا، تاہم انہیں گول کرنے کے لیے کافی جدوجہد کرنی پڑی۔میچ کا واحد اور فیصلہ کن گول پہلے ہاف میں التعاون کے کھلاڑی محمد الدوسری کی جانب سے ہوا، جنہوں نے بدقسمتی سے گیند اپنے ہی جال میں پھینک دی ۔النصر کی یہ لیگ میں مسلسل تیسری فتح ہے ، جس نے اسے الاہلی کے برابر لاکھڑا کیا ہے ۔پرتگالی اسٹار کرسٹیانو رونالڈو کے لیے انفرادی طور پر یہ میچ کچھ خاص نہ رہا۔ان کا ایک گول آف سائیڈ کی وجہ سے مسترد کر دیا گیا۔انہوں نے ایک پنالٹی کی اپیل بھی کی جسے ریفری نے رد کر دیا۔التعاون کے گول کیپر میلسن نے شاندار کارکردگی دکھاتے ہوئے رونالڈو کی کئی کوششوں کو ناکام بنایا۔رونالڈو فی الحال 16 گولز کے ساتھ ٹاپ پر ہیں، تاہم الاہلی کے ایوان ٹونی (15 گولز) ان کے بالکل قریب پہنچ چکے ہیں۔سینیگل کے اسٹار کھلاڑی سادیو مانے ، جو حال ہی میں افریقن کپ آف نیشنز جیت کر واپس آئے ہیں، کا اسٹیڈیم میں شاندار استقبال کیا گیا۔
