عظمیٰ نیوز سروس
راجوری//جموں و کشمیر پولیس نے ضلع راجوری میں منشیات کے خلاف جاری مہم کے تحت ایک اہم کارروائی انجام دیتے ہوئے دو منشیات فروشوں کو گرفتار کر لیا ہے، جن کے قبضے سے 22 گرام ہیروئن نما نشیلی مادہ برآمد کیا گیا ہے۔ پولیس کے مطابق یہ کارروائی پولیس پوسٹ چنگس کی ٹیم نے معمول کی ناکہ چیکنگ کے دوران انجام دی۔پولیس ذرائع کے مطابق ناکہ چیکنگ کے دوران چنگس علاقے میں دو افراد مشکوک حالت میں آتے ہوئے نظر آئے، جنہیں روک کر پوچھ گچھ کی گئی۔ دورانِ تفتیش انہوں نے اپنی شناخت نہید چودھری ولد محمد شفیع اور محمد عاصم ولد محمد شفیع کے طور پر ظاہر کی۔ دونوں ملزمان ضلع راجوری کے وارڈ نمبر 13 پیر کنجو کے رہائشی بتائے جاتے ہیں۔پولیس ٹیم نے قانونی کارروائی کے تحت جب دونوں افراد کی تلاشی لی تو ان کے قبضے سے 22 گرام ہیروئن نما نشیلی مادہ برآمد ہوا۔ ابتدائی تفتیش میں یہ بات سامنے آئی ہے کہ ملزمان راجوری علاقے میں منشیات کی فروخت میں ملوث تھے اور چنگس کے راستے منشیات کی کھیپ فروخت کرنے کی نیت سے جا رہے تھے۔اس سلسلے میں پولیس اسٹیشن راجوری میں ایف آئی آر نمبر 605/2025 درج کی گئی ہے، جو متعلقہ دفعات کے تحت این ڈی پی ایس ایکٹ کے تحت درج کی گئی ہے۔ دونوں ملزمان کو باقاعدہ طور پر گرفتار کر لیا گیا ہے اور انہیں قانونی کارروائی کے لئے پولیس حراست میں رکھا گیا ہے۔راجوری پولیس نے کہا ہے کہ منشیات کے اس غیر قانونی کاروبار کے پیچھے موجود ذرائع اور اس سے جڑے وسیع نیٹ ورک کا پتہ لگانے کے لئے مزید تفتیش جاری ہے۔ پولیس نے اس عزم کا اعادہ کیا کہ ضلع میں منشیات کے خلاف زیرو ٹالرینس پالیسی کے تحت سخت کارروائیاں جاری رکھی جائیں گی تاکہ نوجوان نسل کو اس سماجی برائی سے محفوظ رکھا جا سکے۔
