عظمیٰ نیوز سروس
ممبئی// روپیہ پیر کو ڈالر کے مقابلے میںاپنی کم ترین سطح پر پہنچ گیا۔ ابتدائی تجارت میں روپیہ 9پیسے کم ہوکر 90.58فی ڈالر پر کھلا۔ روپے کی اس تاریخی کمزوری نے مالیاتی منڈیوں میں خوف و ہراس پھیلا دیا ہے۔ ماہرین کا خیال ہے کہ موجودہ صورتحال میں ملکی اور عالمی دونوں عوامل کی وجہ سے روپیہ دبا کا شکار ہے۔2025 کے آغاز میں، یکم جنوری کو، روپیہ 85.70 فی ڈالر پر تھا۔ صرف چند مہینوں میں اس میں 5 فیصد سے زیادہ کمی آئی ہے۔ روپے کی قدر میں کمی کا براہ راست اثر ملکی درآمدی بل پر پڑتا ہے۔ ہندوستان اپنی ضروریات کا ایک بڑا حصہ خام تیل، گیس اور سونے کی شکل میں بیرون ملک سے درآمد کرتا ہے۔ کمزور روپیہ ان تمام درآمدات کو مزید مہنگا کر دیتا ہے جس کا بوجھ بالآخر عام صارف تک پہنچتا ہے۔روپے کی گراوٹ سے پٹرول اور ڈیزل کی قیمتوں پر دبا بڑھ سکتا ہے اور مہنگائی بڑھنے کا امکان ہے۔ بیرون ملک تعلیم حاصل کرنے والے طلبا اور بیرون ملک سفر کرنے والوں کے اخراجات میں پہلے کی نسبت نمایاں اضافہ ہوا ہے۔ اب ایک ڈالر خریدنے کے لیے 90 روپے سے زائد خرچ کرنا پڑتا ہے جس کی وجہ سے غیر ملکی یونیورسٹیوں کی فیس، رہائش اور دیگر اخراجات میں نمایاں اضافہ ہو گیا ہے۔ماہرین کے مطابق امریکی ٹیرف پالیسی کے گرد غیر یقینی صورتحال روپے کی کمزوری کی ایک بڑی وجہ ہے۔ امریکہ کی طرف سے ہندوستانی مصنوعات پر لگائے گئے اعلی محصولات سے برآمدات پر اثر انداز ہونے کی توقع ہے، جس سے ممکنہ طور پر غیر ملکی زرمبادلہ کی آمد میں کمی واقع ہوگی۔ دوسری طرف، غیر ملکی ادارہ جاتی سرمایہ کاروں نے جولائی 2025 سے ہندوستانی منڈیوں سے اہم سرمایہ نکال لیا ہے۔ اس فروخت کے دوران روپے کے ڈالر میں تبدیل ہونے سے ڈالر کی مانگ میں اضافہ ہوا، جس سے روپیہ مزید کمزور ہوا۔اس کے علاوہ بین الاقوامی مارکیٹ میں خام تیل اور سونے کی قیمتوں میں اضافے سے ہندوستان کے درآمدی بل میں اضافہ ہوا ہے۔ بہت سی کمپنیاں اور درآمد کنندگان خطرے سے بچنے کے لیے ڈالر کے مقابلے میں اپنی پوزیشن ہیج کر رہے ہیں، جس سے مارکیٹ میں ڈالر کی مانگ میں مزید اضافہ ہو رہا ہے۔
