بڈگام کے عوام نے اعتماد کا مظاہرہ کیا، آغا منتظر کی جیت تاریخی ہے: محبوبہ مفتی

عظمیٰ ویب ڈیسک
سری نگر/پیپلز ڈیموکریٹک پارٹی (پی ڈی پی) کی صدر محبوبہ مفتی نے بڈگام اسمبلی نشست کے ضمنی انتخاب میں پارٹی امیدوار آغا منتظر مہدی کی جیت پر عوام کا شکریہ ادا کرتے ہوئے کہا ہے کہ بڈگام کے باشعور ووٹروں نے تبدیلی، شفافیت اور بہتر سیاست کے حق میں فیصلہ دے کر نئی تاریخ رقم کی ہے۔
محبوبہ مفتی نے سوشل میڈیا پلیٹ فارم ایکس )سابقہ ٹوئٹر) پر اپنے ردعمل میں لکھا:یہ جیت نہ صرف پی ڈی پی کے لیے تقویت کا باعث ہے بلکہ کشمیر کی سیاست میں ایک نئے موڑ کی نشاندہی کرتی ہے، جہاں عوام نے روایتی خطوط سے ہٹ کر اپنی رائے دی ہے۔ ان کے مطابق بڈگام کے ووٹروں نے ثابت کر دیا کہ وہ گورننس، جوابدہی اور عوامی خدمت کے حوالے سے سنجیدہ قیادت چاہتے ہیں۔‘
محبوبہ مفتی نے اپنے پیغام میں آغا منتظر کو بھی مبارکباد دیتے ہوئے لکھا کہ بڈگام کے عوام نے انہیں ایک بڑی ذمہ داری سونپی ہے، اور وہ امید کرتی ہیں کہ وہ عوامی امنگوں کے مطابق کام کریں گے۔
ان کا یہ ردعمل اس وقت سامنے آیا ہے جب پی ڈی پی نے نیشنل کانفرنس کو اس نشست پر پہلی مرتبہ شکست دے کر سیاسی حلقوں میں غیر متوقع صورتحال پیدا کر دی ہے۔ ضمنی چناؤ کے نتائج کے بعد وادی کی سیاسی فضا میں تیزی سے نئی بحثیں جنم لے رہی ہیں۔