عظمیٰ ویب ڈیسک
اسلام آباد/اسلام آباد کے علاقے جی الیون میں کچہری کے باہر خُودکش بمبار کے حملے کے نتیجے میں 12 افراد ہلاک اور 20 سےزائد زخمی ہونے کی اطلاع ہے۔ڈان نیوز کے مطابق سرکاری نشریاتی ادارے ’پی ٹی وی نیوز‘ نے کہا ہے کہ اسلام آباد جی الیون کچہری کے باہر فتنۃ الخوارج نے خودکش دھماکہ کیا۔ابتدائی رپورٹ کے مطابق دھماکہ کچہری کے باہر ہوا جس کی زد میں آس پاس کھڑے لوگ آئے۔
پمز ہسپتال کے ذرائع کا کہنا ہے کہ اب تک کی رپورٹ کے مطابق 12 افراد کی لاشیں اور 20 سے 22 زخمیوں کو ہسپتال منتقل کیا گیا ہے۔قبل ازیں دھماکے کی اطلاع ملنے پر پولیس اور ریسکیو کی ٹیمیں موقع پر پہنچ گئیں، ریسکیو ذرائع کا کہنا ہے کہ دھماکے میں وکلا بھی زخمی ہوئے ہیں۔
کچہری کے باہر دھماکے کے بعد عمارت خالی کرالی گئی، وکلا، ججز اور سائلین کو کچہری سے نکال دیا گیا، جوڈیشل کمپلیکس کے عقبی حصے کی طرف شہریوں اور وکلا کو نکالا گیا، ججز کو بھی روانہ کر دیا گیا۔پولیس حکام کا کہنا تھا کہ دھماکہ کچہری کی پارکنگ میں کھڑی گاڑی میں ہوا ہے، دھماکے کی نوعیت کا اندازہ لگایا جا رہا ہے، دارالحکومت میں دھماکے کی آواز دور تک سنی گئی اور دھماکے کے باعث لوگوں میں خوف وہراس پھیل گیا تھا۔
اسلام آباد کچہری کے باہر خود کش بمبار کے حملے میں 12 افراد ہلاک، 22 زخمی
