عظمیٰ نیوزڈیسک
کمپالا//افریقی ملک یوگانڈا میں بدھ کو ایک دردناک سڑک حادثہ پیش آیا جس میں کم از کم 63 افراد کی موت واقع ہو گئی۔ حادثہ گلو شہر جانے والی شاہراہ پر پیش آیا، جہاں 2 بسیں اور 2 دیگر گاڑیاں آپس میں ٹکرا گئیں۔ 4 گاڑیوں کے ٹکرانے سے علاقہ میں چیخ و پکار مچ گئی، جس کے بعد مقامی لوگ وہاں پہنچے اور پولیس کو حادثہ کی جانکاری دی۔ پولیس کا کہنا ہے کہ یہ حادثہ علی الصبح پیش آیا۔یہ حادثہ مشرقی افریقی ملک یوگانڈا میں حالیہ سالوں میں پیش آئے سب سے دردناک سڑک حادثات میں سے ایک ہے۔ اس حادثہ میں ہلاکتوں کے علاوہ کئی دیگر افراد زخمی بھی ہوئے ہیں، جنھیں اسپتالوں میں علاج کے لیے داخل کرایا گیا ہے۔ پولیس نے بتایا کہ برعکس سمت میں جا رہی 2 بسوں کے ڈرائیور نے 2 مختلف گاڑیوں کو اوورٹیک کرنے کی کوشش کی۔ اسی دوران کریانڈونگو شہر کے پاس چاروں گاڑیاں آپس میں ٹکرا گئیں۔اس حادثہ پر ریڈ کراس کی ترجمان آئیرین ناکاسیتا نے اپنا رد عمل ظاہر کرتے ہوئے کہا کہ کئی زخمیوں کے ہاتھ اور پیر ٹوٹ گئے ہیں۔ کچھ زخمیوں کے جسم سے خون بہہ رہا تھا، جنھیں فوری طور پر علاج کے لیے ہسپتال میں داخل کرایا گیا۔ آئیرین نے حادثہ کو انتہائی دردناک بتایا، اور کہا کہ اس نے کئی زندگیوں کو ختم کر دیا۔اس سڑک حادثہ کی تحقیقات شروع ہوئی ہے۔ پولیس نے اپنے ایک بیان میں کہا کہ جانچ جاری ہے، لیکن گاڑی چلانے والوں کو دھیان سے ڈرائیو کرنے کی ضرورت ہے۔ انھوں نے بتایا کہ وہ سبھی گاڑی چلانے والوں سے زور دے کر کہہ رہے ہیں کہ سڑکوں پر زیادہ سے زیادہ احتیاط برتیں۔ خصوصاً خطرناک اور لاپروائی کے ساتھ اوورٹیک کرنے سے بچیں۔
