چار سال سے مفرور سری نگر کا شہری گرفتار: سی بی کے

عظمیٰ ویب ڈیسک
سری نگر/کرائم برانچ کشمیر (سی بی کے) کی اقتصادی جرائم ونگ نے سری نگر سے تعلق رکھنے والے چار برسوں سے مفرور ایک ملزم کے خلاف طویل عرصے سے زیر التوا وارنٹ کو کامیابی کے ساتھ عمل میں لایا اور اس کو گرفتار کیا گیا۔ونگ کے ایک ترجمان نے اپنے ایک بیان میں کہا کہ کرائم برانچ کشمیر کے اقتصادی جرائم ونگ نے خالد سہانی ولد فاروق سہانی ساکن ریشی محلہ کھر ڈوری، شہید گنج، سری نگر کے خلاف ایک طویل عرصے سے زیر التوا وارنٹ کو کامیابی کے ساتھ عمل میں لایا۔
انہوں نے کہا کہ یہ وارنٹ 3 دسمبر 2021 کو معزز عدالت جوڈیشل مجسٹریٹ فرسٹ کلاس، ویلو ضلع اننت ناگ کی جانب سے پولیس اسٹیشن کرائم برانچ کشمیر میں متعلقہ دفعات کے تحت زیر ایف آئی آر نمبر 38/2018 درج ایک مقدمے کے سلسلے میں جاری کی گئی تھی۔
ان کا کہنا ہے کہ ملزم گزشتہ چار سال سے گرفتاری سے فرار تھا اور معتبر معلومات پر کارروائی کرتے ہوئے، اقتصادی جرائم ونگ (کرائم برانچ کشمیر) نے 10 اکتوبر 2025 کو ملزم کو گرفتار کیا۔موصوف ترجمان نے بتایا کہ ملزم کو معزز عدالت میں پیش کیا گیا، جہاں عدالت نے اس کی عدالتی تحویل کا حکم دیا اور ہدایت کی کہ اسے سینٹرل جیل سری نگر میں رکھا جائے۔
انہوں نے کہا اس گرفتاری کے ساتھ، ایک طویل عرصے سے زیر التوا سی آر پی سی 512 وارنٹ کو کامیابی کے ساتھ عمل میں لایا گیا ہے، جو کہ مالی فراڈ کے اس معاملے میں انصاف کے حصول میں ایک اہم قدم ہے۔ان کا کہنا ہے کہ کرائم برانچ کشمیر اس بات کو یقینی بنانے کے لئے پر عزم ہے کہ معاشی جرائم میں ملوث مجرموں کو انصاف کے کٹہرے میں لایا جائے، چاہے وہ قانون سے بچنے کی کتنی ہی کوشش کریں۔