مشینری اورافرادی قوت کوتیار رکھنے کی ہدایت
گاندربل// موجودہ خراب موسم کے پیش نظر، ڈپٹی کمشنر گاندربل، جتن کشور اورڈپٹی کمشنرکولگام اطہرعامرخان نے کل اضلاع کے مختلف نشیبی علاقوں کا ایک وسیع دورہ کیا تاکہ پانی کی سطح میں اضافے کی وجہ سے پیدا ہونے والی زمینی صورتحال کا جائزہ لیا جا سکے۔ڈپٹی کمشنر گاندربل نے دورے کے دوران بملورہ، فتح پورہ، گدورہ، راکھی ہراں اور دیگر حساس مقامات کا معائنہ کیا تاکہ صورتحال کا ذاتی طور پر جائزہ لیا جا سکے۔ایگزیکٹیو انجینئر آئی اینڈ ایف سی نے ڈی سی کو پانی کی موجودہ سطح اور کمزور حصوں پر پشتوں کو مضبوط کرنے کے لیے کیے گئے اقدامات کے بارے میں بریفنگ دی۔ڈی سی نے آئی اینڈ ایف سی حکام کو ہدایت کی کہ وہ افراد اور مشینری کو مستعد حالت میں رکھیں اور نشاندہی شدہ مقامات پر ریت کے تھیلوں کی دستیابی کو یقینی بنائیں۔ انہوں نے انخلاء کے منصوبوں کو برقرار رکھنے پر مزید زور دیا۔تحصیلدار نے بتایا کہ انخلاء کے لیے موزوں مقامات کی پہلے ہی نشاندہی کر دی گئی ہے اور ضرورت پڑنے پر انہیں فعال کر دیا جائے گا۔ڈی سی نے ہدایت کی کہ خطرے سے دوچار علاقوں میں باقاعدگی سے اعلانات کیے جائیں تاکہ عوام کو الرٹ رکھا جائے اور ہنگامی صورتحال کی صورت میں احتیاطی تدابیر سے آگاہ کیا جائے۔بعد ازاں ڈی سی نے کج پورہ کنگن کا بھی دورہ کیا اور کج پورہ نالہ کے اوپر کج پورہ سڑک کی حالت کا جائزہ لیا۔ انہوں نے ایس ڈی ایم کنگن کو چوکس رہنے کی ہدایت کی اور بیکن حکام سے کہا کہ وہ ایس ایس جی روڈ کے ساتھ متاثرہ جگہوں سے ملبے کی بروقت صفائی کو یقینی بنائیں تاکہ اسے ٹریفک کے قابل بنایا جاسکے۔انہوں نے عوامی زندگی اور املاک کے تحفظ کے لیے انتظامیہ کے عزم کا اعادہ کیا، جبکہ سندھ نالے اور دیگر آبی ذخائر کے ارد گرد رہنے والے رہائشیوں پر زور دیا کہ وہ محتاط رہیں، غیر محفوظ علاقوں سے گریز کریں اور ضلعی انتظامیہ کی جانب سے جاری کردہ ایڈوائزری پر عمل کریں۔ادھر ڈپٹی کمشنر کولگام، اطہر عامر خان نے ایس ایس پی کولگام، ساحل سرنگل کے ساتھ کل کئی علاقوں بشمول کھڈونی، کیموہ، برازلو، چمبا گنڈ، آد پورہ اور دیگر مقامات کا دورہ کیا تاکہ مسلسل بارش کی وجہ سے پیدا ہونے والی صورتحال کا جائزہ لیا جا سکے۔دورے کے دوران ڈی سی نے ان مقامات پر صورتحال کا معائنہ کیا اور مقامی لوگوں سے بات چیت کی۔ بتایا گیا کہ کھڈوانی کے قریب پانی کی سطح خطرے کے نشان سے تجاوز کر گئی ہے اور حساس مقامات سے لوگوں کو محفوظ مقامات پر منتقل کر دیا گیا ہے۔ڈی سی نے کہا کہ تمام افراد اور مشینری کو ضلع بھر میں متحرک کر دیا گیا ہے تاکہ صورتحال پر فوری اور موثر ردعمل کو یقینی بنایا جا سکے۔انہوں نے عوام پر زور دیا کہ وہ چوکس رہیں اور کسی بھی قسم کی مدد کے لیے ڈسٹرکٹ کنٹرول روم کے نمبر 01931-295900 اور 9103424365 پر رابطہ کریں۔ انہوں نے لوگوں سے بھی اپیل کی کہ وہ غیر ضروری نقل و حرکت سے گریز کریں اور سیلابی ندیوں اور لینڈ سلائیڈنگ کے شکار علاقوں سے دور رہیں۔
