عظمیٰ ویب ڈیسک
سرینگر/شری امرناتھ جی یاترا کے لئے 7 ہزار سے زیادہ یاتریوں پر مشتمل آٹھواں قافلہ سخت سیکورٹی بندوبست کے بیچ بدھ کی صبح بھگوتی نگر بیس کیمپ سے کشمیر کے لئے روانہ ہوا۔سرکاری ذرائع نے بتایا کہ بھگوتی نگر بیس کیمپ سے بدھ کی صبح 7 ہزار 5 سو 79 یاتریوں پر مشتمل ایک اور قافلہ 318 چھوٹی بڑی گاڑیوں میں کشمیر کے لئے روانہ ہوا۔
انہوں نے کہا کہ ان یاتریوں میں 5 ہزار 7 سو 19 مرد، 1 ہزار 5 سو 77 خواتین اور 40 بچے شامل تھے۔ان کا کہنا ہے کہ 3 ہزار 31 یاتری 142 گاڑیوں میں بالتل بیس کیمپ کے لئے جبکہ 4 ہزار 5سو 48 یاتری 176 گاڑیوں میں ننون پہلگام بیس کیمپ کے لئے روانہ ہوئے۔
ادھر حکام نے بتایا کہ یاترا کے پہلے 6 دنوں کے دوران ایک لاکھ سے زیادہ پوتر گھپا کے درشن سے فیضیاب ہوئے ہیں۔واضح رہے کہ جموں و کشمیر کے لیفٹیننٹ گورنر منوج سنہا نے 2 جولائی کو بھگوتی نگر بیس کیمپ سے پہلے قافلہ کو جھنڈی دکھا کر روانہ کیا تھا۔امسال 38 دنوں کو محیط یہ یاترا 9 اگست کو رکشا بندھن کے موقع پر اختتام پذیر ہوگی۔یاترا احسن اور کامیاب انعقاد کے لئے سیکورٹی اور دیگر سہولیات کے تمام تر انتظامات کئے گئے ہیں۔
امرناتھ یاترا:بھگوتی نگر بیس کیمپ سے 7 ہزار سے زیادہ یاتریوں کا آٹھواں قافلہ کشمیر روانہ
