یاترا خدمت اور لگن کا پہلو ہوتی ہیں: مودی یاترا خدمت اور لگن کا پہلو ہوتی ہیں: مودی

عظمیٰ ویب ڈیسک
نئی دہلی/وزیر اعظم نریندر مودی نے کہا ہے کہ یاترا محض ’چلو بلاوا آیا ہے‘ ہی نہیں ہے بلکہ یہ تیرتھ یاتریوں اور ان کی خدمت کرنے والے عقیدت مندوں کی خدمت اور لگن کا پہلو بھی ہے۔
اتوار کو آل انڈیا ریڈیو پر نشر ہونے والے اپنے ماہانہ پروگرام ’من کی بات‘ کے 123ویں ایپی سوڈ میں مسٹر مودی نے کہا کہ یاتری کے ذہن میں جو پہلا احساس آتا ہے وہ ہے ’چلو، بلاوا آیا ہے‘ اور یہ احساس مذہبی یاتراؤں کی روح ہے۔
انہوں نے کہا کہ یہ یاترائیں جسم کو نظم و ضبط، ذہن کو پاک کرنے، باہمی محبت اور بھائی چارے اور پربھو سے جڑنے کا ذریعہ ہیں۔ اس کے علاوہ ان یاتراؤں کا ایک اور بڑا پہلو یہ ہے کہ یہ یاترائیں خدمت کے مواقع کی ایک عظیم شکل بھی ہے۔ جب تیرتھ یاترا ہوتی ہے تو جتنے لوگ یاترا پر جاتے ہیں اس سے کہیں زیادہ لوگ تیرتھ یاتریوں کی خدمت میں مشغول ہوجاتے ہیں۔ جگہ جگہ بھنڈارے، لنگر اور پیاؤ لگائے جاتے ہیں۔ خدمت کے جذبے سے میڈیکل کیمپ اور سہولیات کا اہتمام کیا جاتا ہے۔ اس کام میں بہت سے لوگ اپنے خرچ پر دھرم شالوں اور یاتریوں کے رہنے اور کھانے پینے کا انتظام کرتے ہیں۔
کیلاش مانسروور یاترا کا ذکر کرتے ہوئے وزیر اعظم نے کہا’کیلاش مانسروور یاترا طویل عرصے کے بعد دوبارہ شروع ہوئی ہے۔ کیلاش مانسروور کا مطلب ہے بھگوان شیو کا دھام۔ ہندو ہو، بدھ مت یا جین ہر روایت میں کیلاش کو عقیدہ اور بھگتی کا مرکز سمجھا گیا ہے۔ 3 جولائی سے مقدس امرناتھ یاترا شروع ہونے جا رہی ہے اور ساون کا مقدس مہینہ بھی چند دن دور ہے۔ ابھی کچھ دن پہلے ہم نے بھگوان جگن ناتھ جی کی رتھ یاترا بھی دیکھی ہے۔ اڈیشہ ہو، گجرات ہو یا ملک کا کوئی اور کونا، لاکھوں عقیدت مند اس یاترا میں شریک ہوتے ہیں۔ شمال سے جنوب، مشرق سے مغرب تک، یہ یاترا ’ایک بھارت-شریشٹھ بھارت‘ کے جذبے کی عکاسی کرتی ہیں۔ جب ہم اپنی مذہبی یاترا مذہبی جذبے، مکمل لگن اور مکمل نظم و ضبط کے ساتھ مکمل کرتے ہیں تو اس کا پھل بھی ہمیں ملتا ہے۔ میں یاترا پر جانے والے تمام خوش نصیب عقیدت مندوں کو نیک خواہشات پیش کرتا ہوں۔‘‘
انہوں نے کہا کہ میں ان لوگوں کو بھی مبارکباد پیش کرتا ہوں جو خدمت کے جذبے کے ساتھ ان یاتراؤں کو کامیاب اور محفوظ بنانے میں مصروف ہیں۔