سری نگر پولیس نے ایک منشیات فروش کی غیر منقولہ جائیداد ضبط کی

عظمیٰ ویب ڈیسک
سری نگر/منشیات فروشوں کے خلاف کریک ڈاؤن کو جاری رکھتے ہوئے سری نگر پولیس نے ایک منشیات فروش کی قریب 50 لاکھ روپیے مالیت کی غیر منقولہ جائیداد کو این ڈی پی ایس ایکٹ کے تحت ضبط کر دیا۔ایک پولیس ترجمان نے اپنے ایک بیان میں کہا کہ سری نگر پولیس نے ایک بدنام زمانہ منشیات فروش کی قریب 50 لاکھ روپیے مالیت کی غیر منقولہ جائیداد جس میں زمین اور دو منزلہ رہائشی مکان شامل ہے، کو این ڈی پی ایس ایکٹ کے تحت ضبط کیا ہے۔
مذکورہ منشیات فروش کی شناخت بلال احمد وانی ولد غلام احمد وانی ساکن سری گفوارہ اننت ناگ کے طور پر کی گئی ہے۔انہوں نے کہا کہ ملزم پولیس اسٹیشن شہید گنج میں این ڈی پی ایس ایکٹ کے متعلقہ دفعات کے تحت درج ایف آئی آر زیر نمبر 5/2025 میں ملوث ہے۔
بیان میں کہا گیا مذکورہ جائیداد کو منشیات کی غیر قانونی اسمگلنگ کے ذریعے حاصل کیا گیا ہے۔انہوں نے کہا کہ این ڈی پی ایس ایکٹ کے سیکشن 68-E اور 68-F کے تحت کارروائی کرتے ہوئے مذکورہ غیر منقولہ جائیداد کو باضابطہ طور پر ضبط اور منسلک کر دیا گیا ہے۔ان کا کہنا ہے کہ مذکورہ جائیداد کو مجاز اتھارٹی کی پیشگی اجازت کے بغیر فروخت، منتقل یا کسی اور طرح سے ڈیل نہیں کیا جائے گا۔
پولیس ترجمان نے بتایا کہ ملزم کی منشیات کی اسمگلنگ کی ہسٹری ہے اور وہ منشیات کی سپلائی میں سرگرم عمل رہا ہے اور خاص طور پر مقامی نوجوانوں کو ٹارگیٹ کر رہا تھا جس سے صحت عامہ اور حفاظت کو سنگین خطرہ لاحق تھا۔انہوں نے کہا کہ یہ کارروائی جموں و کشمیر پولیس کے منشیات کی سمگلنگ کے نیٹ ورکس کے خلاف جاری کریک ڈاؤن کا حصہ ہے۔ان کا کہنا ہے کہ اس طرح کے نیٹ ورکس کے مالیاتی ڈھانچے کو نشانہ بنانے اور اسے ختم کرنے کا، پولیس کا مقصد منشیات کے پھیلاؤ کو روکنا اور کمیونٹی کی حفاظت کرنا ہے۔