زاہد بشیر
گول// بعد دوپہر پانچ بجے کے قریب بارشوں کا سلسلہ جاری ہوا جس نے سخت رخ اختیار کرتے ہوئے نظام زندگی کو مفلوج کر رکھ دیا ۔ گول بازار میں سڑک ایک ندی کی صورت اختیار کر گئی وہیں کئی بستیوں میں پانی آنے کی وجہ سے لوگوں کو فصلات و زرعی اراضی کو شدید نقصان پہنچا ۔ گول بازار میں شدید بارشوں کی وجہ سے تمام پانی سڑک پر آیا جہاں سے چلنا محال بن گیا ۔ بازار اکی ایک طرف کی سڑک جو خستہ حال میں ہے اور یہاں آب ِ نکاس کا نظام بھی درہم برہم ہو چکا ہے ۔گول بازار میں کئی دکانوں میں یہ پانی اندر جانے کی وجہ سے انہیں کافی نقصان ہوا ہے ۔ کئی جگہوں پر تقسیم ہونے والا سارا پانی ایک ہی جگہ سے گیا جس وجہ سے مسجد محلہ کی بستی میں پانی گیا اور وہاں لوگوں کو کافی نقصان ہوا ہے ۔ گول بازار میں بارش کے پانی کی تقسیم کے لئے تین جگہوں پر پلیاں ہوا کرتی تھیں اور یہ پلیاں کئی برسوں سے ملبے کی وجہ سے بند پڑی ہیں اگر چہ حالیہ دنوں میں ایس ڈی ایم کے پاس وفد نے بھی استدعا کی تھی کہ نیابت کے نزدیک پلی کو کھول دیا جائے تا کہ پانی تقسیم ہو سکے اور گول بازار کی نالی میں محکمہ جل شکتی کی جانب سے بڑی بڑی پانی کی پائپیں بچھائی گئیں جس وجہ سے نالی میں آنے والے پانی کو آگے جانے میں کافی رکاوٹ پیدا ہوتی ہے ۔ وہیں گول بازار سے جڑنے والی تمام سڑکوں جن میں گول سلبلہ ، گول بائی پاس ، گول جمن ،گول شیمٹی مندر روڈ و دیگر سڑکوں میں نکاسی آب نہ کے برابر ہے ۔ تمام نالیاں بند پڑی ہوئی ہیں یہ چھوٹی سڑکیں محکمہ تعمیرات عامہ کے تحت آتی ہیں لیکن ان سڑکوں میں نالیوں کی حالت نہایت ہی ابتر ہے ۔ آج کی بارش نے محکمہ گریف اور محکمہ تعمیرات عامہ کی پول اُس وقت کھول کر رکھ دی جب بارشوں کا سارا پانی سڑکوں پر آیا اور نالیوں میں لوگوں کا تعمیراتی میٹریل، ملبہ وغیرہ پڑا ہوا تھا ۔ اگر چہ ان نالیوں کی حالت حالت پر کئی مرتبہ محکمہ جات سے بھی اپیل کی تھی لیکن اس جانب کسی نے کوئی توجہ نہیں دی جس وجہ سے آج اچانک بارش آنے کی وجہ سے لوگوں کو کافی نقصانات سے دوچار ہونا پڑا۔ ضرورت اس بات کی ہے کہ انتظامیہ کو چاہئے کہ وہ گول سڑکوں کے ساتھ ساتھ نکاسی آب کی حالت کو بہتر بنایا جائے تا کہ اس طرح کی بارشوں سے آنے والے پانی سے لوگوں کو نقصان نہ ہو ۔ اس دوران لوگوں نے گول میں نکاسی آب کی حالت پر سخت تشویش کا اظہار کیا اور دکانداروں کوجو نقصان ہوا ہے اس پر دکھ کا اظہار کرتے ہوئے سرکار سے مطالبہ کیا کہ گول بازار کے ساتھ ساتھ ملحقہ جات میں نکاسی آب کی حالت کو بہتر بنایا جائے اور جو دکانداروں کو نقصان ہوا ہے اس کی بھر پائی کی جائے ۔
