یو این آئی
سٹٹگارٹ (جرمنی)/پرتگال نے کرسٹیانو رونالڈو کے میچ وننگ گول کی بدولت جرمنی کو 2-1 سے شکست دے کر نیشنز لیگ کے فائنل میں جگہ بنا لی ہے ۔بدھ کو کھیلے گئے نیشنز لیگ کے سیمی فائنل کے پہلے ہاف میں جرمنی حاوی رہا اور پرتگال پر گول کرنے کی کئی جارحانہ کوششیں کیں لیکن پرتگال کے گول کیپر ڈیوگو کوسٹا کی شاندار کارکردگی کی بدولت ہاف بغیر کسی گول کے رہا۔فلورین ویرٹز نے 48ویں منٹ میں جرمنی کے جوشوا کِمِچ کے درست پاس پر گول کر کے اپنی ٹیم کو برتری دلا دی۔ اس کے کچھ دیر بعد پرتگال کے متبادل فرانسسکو کونسیکاو نے 63ویں منٹ میں گول کر کے میچ 1-1 سے برابر کر دیا۔ پانچ منٹ بعد 40 سالہ رونالڈو نے اپنا 137 واں بین الاقوامی گول کر کے اپنی ٹیم کو میچ جیتنے والی برتری دلا دی۔ اس گول کے ساتھ ہی رونالڈو جرمنی کے خلاف گول کرنے والے سب سے معمر کھلاڑی بن گئے ہیں۔میچ کے بعد پرتگال کے کوچ رابرٹو مارٹینز نے کہا کہ ہمیں فتح کا لطف لینا چاہیے ، ہم نے جرمنی کے خلاف طویل عرصے کے بعد کامیابی حاصل کی ہے ، حکمت عملی سے ہم بہترین تھے ، یہ پوری ٹیم کی فتح ہے ۔ لیگ کا دوسرا سیمی فائنل میچ اسپین اور فرانس کے درمیان ہوگا۔ اس میچ کی فاتح ٹیم اتوار کو خطابی میچ میں پرتگال سے مقابلہ کرے گی۔
