عاصف بٹ
کشتواڑ//منگل کی دیررات کشتواڑ ضلع بھر میں تیز آندھی وآسمانی بجلی گرنے سے متعدد مقامات پر نقصان ہواہے۔ کشتواڑ ضلع کے سب ڈویڑن چھاترو میں آسمانی بجلی گرنے سے ایک بکروال کی موت ہوگئی اور اس کی متعدد بھیڑیں ہلاک ہوئی ہیں۔تفصیلات کے مطابق سنتھن میدان میں خانہ بدوش بکروال اپنے مال مویشیوں کے ساتھ موجود تھا۔ اِس دورا ن آسمانی بجلی آگری جس کی زد میں آکر ایک بکروال جاں بحق ہوگیا۔متوفی کی شناخت آزاد احمد ولد مہوالی کے طور ہوئی ہے ۔ عینی شاہدین نے بتایا کہ آسمانی بجلی گرنے سے آزاد احمد موقع پر ہی دم توڑ گیا۔ اس کے علاوہ اس کی کئی بھیڑیں بھی آسمانی بجلی گرنے سے ہلاک ہوئی جبکہ بھاری تعداد میں مال مویشی شدید زخمی ہو گئے۔آزاد احمد اپنے خاندان کا واحد کمانے والا تھا اور مال مویشی اس ذریعہ معاش تھا۔واقعہ کی اطلاع ملتے ہی مقامی انتظامیہ اور پولیس موقع پر پہنچ گئی۔ پولیس نے متوفی کی نعش کو پوسٹ مارٹم کے لیے تحویل میں لے لیا ہے جبکہ حکام نے محکمہ پشوپالن کو نقصانات کا جائزہ لینے کی ہدایت کی ہے۔آسمانی بجلی گرنے اور تیز آندھی نے جہاں جنگلوں میں قیام پذیر خانہ بدوشوں پر قہر ڈھایا ہے وہیں میدانی علاقوں میں بھی مکانات کی چھتیں اْڑ گئی ہیں ۔معتدد مقامات پر مکانات کو بھاری پیمانے پر نقصان کی اطلاع موصول ہورہی ہیں جبکہ کئی جگہوں پر درخت سڑکوں پر گرآئے ہیں۔حکام نقصان کا پتہ لگانے میں مصروف ہیں۔
