عظمیٰ نیوزسروس
سرینگر//جموں کشمیر سینٹرل کنٹریکٹرس کارڈی نیشن کمیٹی نے وزیر اعلیٰ عمر عبداللہ سے ملاقات کے دوران ایک پانچ نکاتی یادداشت پیش کرتے ہوئے امید ظاہر کی ہے کہ ٹھیکیداروں کو درپیش اہم مسائل کو جلد از جلد حل کیا جائے گا۔ وزیر اعلیٰ نے بھی ٹھیکیداروں کے جائز مسائل کے ازالے کیلئے حکومتی سطح پر فوری اقدامات کی یقین دہانی کرائی ہے۔جمعہ کو وزیر اعلیٰ کی رہائش گاہ پر ہونے والی اس اہم ملاقات میں کمیٹی کے وفد نے جنرل سیکریٹری فاروق احمد ڈار کی قیادت میں شرکت کی، جو کشمیر اکنامک الائنس کے شریک چیئرمین بھی ہیں۔ وفد میں جے کے سی سی سی سی کے سینیئر لیڈر محمد افضل کوچھے، ایڈوائزر جاوید احمد زرگر، سیکریٹری ارشد احمد بٹ، عمر جاوید خان، محمد شفیع وانی، اور شوکت احمد وانی شامل تھے، جبکہ کشمیر اکنامک الائنس سے وابستہ اکائی ٹریڈرس ایسوسی ایشن سینٹرل لالچوک کے سربراہ شیراز احمد بھی موجود تھے۔ وزیر اعلیٰ کے مشیر ناصر اسلم وانی بھی اس میٹنگ میں شریک ہوئے۔ملاقات کے دوران فاروق احمد ڈار نے 2014 سے زیر التوائواجب الادا رقومات کی فوری واگزاری پر زور دیا اور کہا کہ ٹھیکدار مالی اداروں کے قرض تلے دب چکے ہیں، جس کی وجہ سے وہ نہ صرف کاروبار سے ہاتھ دھو بیٹھے ہیں بلکہ بے روزگاری کے دہانے پر پہنچ چکے ہیں۔ انہوں نے ای ٹینڈرنگ کا عمل 10 لاکھ روپے سے شروع کرنے اور 5 لاکھ روپے تک کے ٹینڈروں کو مخصوص شرائط سے مشروط رکھنے کا مطالبہ کیا۔فاروق احمد ڈار نے ٹھیکداروں کے کارڈوں کی جانچ کے غیرضروری عمل کو ختم کرنے کی بھی اپیل کی، جس سے ان کے بقول وقت کا زیاں اور بداعتمادی کا ماحول پیدا ہوتا ہے۔ انہوں نے تعمیراتی میٹریل کی بلاتعطل دستیابی پر زور دیتے ہوئے کہا کہ ترقیاتی کاموں کی راہ میں رکاوٹیں دور کی جانی چاہئیں اور ٹھیکداروں کو غیرضروری تنگ و طلب سے بچایا جائے۔ٹھیکداروں نے اس موقع پر ای چالان کے نظام میں بہتری لانے کی ضرورت پر بھی زور دیا اور کہا کہ ای چالان کی فائلوں کو متعلقہ ڈویڑنوں میں ہی نمٹایا جائے تاکہ ٹریجری دفاتر پر دباؤ کم ہو۔ انہوں نے کہا کہ اس وقت ای چالان کے مرحلے میں ٹریجریوں میں ضرورت سے زیادہ بھیڑ ہوتی ہے، جس کے باعث ٹھیکداروں کا قیمتی وقت ضائع ہو رہا ہے اور کاموں کی رفتار بھی متاثر ہو رہی ہے۔وفد نے وزیر اعلیٰ سے اپیل کی کہ ٹھیکیداروں کیلئے ایک بہتر اور معاون ماحول فراہم کیا جائے تاکہ تعمیر و ترقی کے منصوبوں میں تیزی لائی جا سکے۔ فاروق احمد ڈار نے وزیر اعلیٰ کی طرف سے مثبت ردعمل اور تعاون کی یقین دہانی کا خیرمقدم کرتے ہوئے کہا کہ انہیں یقین ہے کہ عمر عبداللہ ذاتی دلچسپی لیتے ہوئے ٹھیکداروں کے مسائل کو سنجیدگی سے حل کریں گے۔ انہوں نے مزید کہا کہ وزیر اعلیٰ نے تجارتی مرکز لالچوک کے دکانداروں کو درپیش مشکلات کے ازالے کا بھی یقین دلایا ہے۔
