ویبھو کی اصل عمر پر سوال اُٹھ گئے

ممبئی /انڈین پریمیئر لیگ (آئی پی ایل) میں سنچری بنانے والے 14 سالہ کرکٹر ویبھو سوریاونشی کی عمر پر سوال اٹھ گئے۔ گزشتہ دنوں آئی پی ایل میں راجستھان رائلز کے کم عمر ترین کھلاڑی ویبھو سوریاونشی نے کرکٹ کی دنیا میں تہلکہ مچایا اور 14سال کی عمر میں سنچری اسکور کرکے نئی تاریخ رقم کی۔نوجوان کھلاڑی نے گجرات ٹائٹنز کے خلاف 35 گیندوں پر سنچری بنا کر ناصرف آئی پی ایل بلکہ کسی بھی بھارتی کی جانب سے تیز ترین ٹی ٹونٹی سنچری کا ریکارڈ قائم کردیا۔ ویبھو سوریاونشی آئی پی ایل میں سنچری سکور کرنے والے کم عمر ترین کھلاڑی بھی بنے۔ جہاں 14 سالہ سوریاونشی کی بیٹنگ کی تعریف کی جارہی ہے وہیں ان کی عمر کے حوالے سے بھی سوالات اٹھ رہے ہیں کہ ان کی عمر 14 سال نہیں بلکہ تقریباً 16 سال ہے۔سابق باکسر وجیندر سنگھ نے سوشل میڈیا پوسٹ کے ذریعے بظاہر سوریاونشی کی عمر پر سوال اٹھایا کہ کیا اب کرکٹ میں بھی عمر کی جعلسازی عام ہو چکی ہے؟ انہوں نے کہا کہ ‘بھائی آج کل عمر چھوٹی کر کے کرکٹ میں بھی کھیلنے لگے ہیں۔ اس کے علاوہ سوشل میڈیا پر صارفین بھی سوریا ونشی کی عمر کے حوالے سے سوال اٹھا رہے ہیں۔ ان سوالات کے اٹھنے کی اصل وجہ سوریاونشی کا وائرل ہونے والا 2023ء کا ایک پرانا انٹرویو ہے جس میں سوریا ونشی نے بتایا تھا کہ ان کی عمر 14سال ہے۔