عظمیٰ نیوز سروس
راجوری//دھیری ریلیوٹ علاقے میں قائم لفٹ واٹر سپلائی سکیم گزشتہ کئی دنوں سے بند پڑی ہوئی ہے کیونکہ سکیم کا پمپ خراب ہو چکا ہے، جس کے باعث سینکڑوں کنبے شدید پانی کی قلت کا سامنا کر رہے ہیں۔ مقامی لوگوں کے مطابق پانی کی سپلائی مکمل طور پر بند ہے اور محکمہ جل شکتی اس سنگین صورتحال پر توجہ دینے میں ناکام رہا ہے۔ذرائع کا کہنا ہے کہ واٹر سپلائی سکیم پر کوئی مستقل ملازم تعینات نہیں ہے، جس کی وجہ سے اس حساس مشینری کو چلانے اور اس کی دیکھ بھال کی ذمہ داری ڈیلی ویجروں کو سونپی گئی ہے تاہم، یہ ڈیلی ویجر مشینری کو صحیح طریقے سے سنبھالنے کے بجائے ذاتی کاموں میں مصروف رہتے ہیں، جس کی وجہ سے پمپ اکثر خراب رہتا ہے اور علاقے کے لوگ پینے کے پانی کے لئے ترس رہے ہیں۔مقامی لوگوں نے محکمہ کے اعلیٰ افسران کو شدید تنقید کا نشانہ بناتے ہوئے کہا کہ لفٹ واٹر سپلائی سکیم پر تعینات ڈیلی ویجرز پانی کی تقسیم میں ذاتی مخالفت اور رشتہ داریوں کو بنیاد بناتے ہیں۔ ان کے مطابق کچھ افراد کو ترجیح دے کر پانی فراہم کیا جاتا ہے جبکہ باقی عوام نظر انداز ہو جاتی ہے۔لوگوں نے یہ الزام بھی عائد کیا کہ تعینات ملازمین سپلائی لائنوں کی مرمت کیلئے بھی نہیں آتے اور ڈیلی ویجروں نے اپنے رشتہ داروں کے گھروں کو سپلائی لائنوں میں کٹ لگا کر پتیاں لگائی گئی ہیں تاکہ ان کو اضافی پانی مہیا کروایا جاسکے جبکہ عام شہری، جن کے قانونی کنکشن موجود ہیں، وہ پانی سے محروم ہیں۔ خراب لائنوں کی مرمت کی جانب بھی کوئی توجہ نہیں دی جا رہی۔علاقہ مکینوں نے ضلع ترقیاتی کمشنر راجوری اور محکمہ جل شکتی کے اعلیٰ حکام سے پرزور مطالبہ کیا ہے کہ اس واٹر سپلائی سکیم پر مقامی ڈیلی ویجروں کو فوری طور پر ہٹایا جائے اور کسی تربیت یافتہ اور غیر جانبدار عملے کو تعینات کیا جائے تاکہ علاقے میں پانی کی منصفانہ اور مسلسل فراہمی ممکن ہو سکے۔مقامی لوگوں نے انتظامیہ سے اپیل کرتے ہوئے کہاکہ اس شدید گرمی کے موسم میں لوگوں کو پانی کی سپلائی فراہم کرنے کیلئے جلدازجلد مشینری کی مرمت کروائی جائے تاکہ لوگوں کی پریشانی ختم ہو سکے ۔
