سرینگر-جموں شاہراہ یک طرفہ ٹریفک کے لیے بحال، وزیراعلیٰ آج بحالی کے کام کا جائزہ لیں گے

عظمیٰ ویب ڈیسک
سرینگر/جموں و کشمیر کے ضلع رام بن میں طوفانی بارشوں اور مٹی کے تودے گرنے کے بعد پانچ دن کے تعطل کے بعد اہم جموں-سرینگر قومی شاہراہ پر یک طرفہ ٹریفک بحال کر دی گئی ہے۔حکام نے جمعہ کو جموں سے سرینگر کی طرف گاڑیوں کو جانے کی اجازت دی۔
حکام نے بتایاجموں و کشمیر کے وزیر اعلیٰ عمر عبداللہ آج رام بن کا دورہ کریں گے تاکہ 20 اپریل کو بادل پھٹنے سے ہونے والے سیلاب کے باعث تباہ ہونے والی شاہراہ اور دیگر بنیادی ڈھانچے کی مکمل بحالی کے کام کی پیش رفت کا جائزہ لے سکیں۔
انہوں نے بتایا کہ شاہراہ کو بدھ کے روز جزوی طور پر صاف کیا گیا تھا تاکہ رام بن کے متاثرہ حصے میں پھنسے ہوئے مسافروں کو راستہ دیا جا سکے۔متعدد مقامات پر شدید نقصان کے باعث ہزاروں مسافر اور سیاح پھنس گئے تھے، جس سے اس اہم شاہراہ پر سفر میں بڑی رکاوٹ پیدا ہوئی۔
حکام نے کہااگرچہ گاڑیوں کی آمد و رفت دوبارہ شروع ہو چکی ہے، لیکن بہت سے سیاح گھنٹوں طویل ٹریفک جام میں پھنسنے پر مایوسی کا اظہار کر رہے ہیں۔رام بن ضلع میں ٹریفک کا ہجوم ایک بڑا مسئلہ بنا ہوا ہے، کیونکہ حکام نے مرحلہ وار گاڑیوں کی نقل و حرکت کا انتظام کیا۔انہوں نے کہا کہ آنے والے دنوں میں شاہراہ پر دو طرفہ ٹریفک بحال کرنے کی کوششیں جاری ہیں۔