عظمیٰ نیوز سروس
راجوری //رکن پارلیمان میاں الطاف احمد لاروی نے ڈسٹرکٹ ڈیولپمنٹ کوآرڈی نیشن اینڈ مانیٹرنگ کمیٹی کی ایک اہم میٹنگ کی صدارت کی، جو ڈاک بنگلہ راجوری میں منعقد ہوئی۔ اس میٹنگ میں ضلع راجوری میں جاری ترقیاتی کاموں اور مرکزی معاونتی اسکیموں پر عمل درآمد کا جائزہ لیا گیا۔ڈپٹی کمشنر راجوری، ابھیشیک شرما نے ایم پی کو مختلف شعبہ جات میں جاری ترقیاتی منصوبوں کی صورتحال سے آگاہ کیا۔میاں الطاف نے ایم جی نریگا، پردھان منتری آواس یوجنا (دیہی و شہری)، قبائلی فلاحی اسکیموں، ٹھوس و مائع فضلہ مینجمنٹ ،راشٹریہ گرام سوراج ابھیان ،مربوط واٹرشیڈ مینجمنٹ پروگرام اور نیشنل رورل لائیولی ہڈ مشن سمیت دیگر اسکیموں کا تفصیلی جائزہ لیا۔طبی شعبہ پر تبادلہ خیال کے دوران، ایم پی نے گورنمنٹ میڈیکل کالج راجوری میں مریضوں کو دی جانے والی سہولیات کو بہتر بنانے کی ہدایت دی اور بچوں و خواتین کے لئے مخصوص اسپتال کو جلد فعال بنانے پر زور دیا۔ انہوں نے ہسپتال میں مسافروں کیلئے سرائے کی جلد تعمیر کی ہدایت بھی دی۔میاں الطاف نے ڈاکٹروں کی خالی آسامیوں کو ترجیحی بنیادوں پر پْر کرنے پر زور دیا۔ جل جیون مشن کے تحت چل رہے کاموں پر بھی انہوں نے تفصیلی تبادلہ خیال کیا اور ہدایت دی کہ لفٹ واٹر اسکیموں کے لئے ضروری مشینری دسمبر 2025 تک نصب کی جائے۔بجلی کے شعبے کا جائزہ لیتے ہوئے ایم پی نے بلا خلل بجلی فراہمی کو یقینی بنانے کے لیے محکمہ کو ضروری اقدامات کرنے کی ہدایت دی۔انہوں نے بارڈر روڈز آرگنائزیشن (BRO) کو راجوری-تھنہ منڈی-سرنکوٹ روڈ اور جموں-پونچھ نیشنل ہائی وے پر جاری کام میں تیزی لانے کی سخت ہدایت دی۔ ساتھ ہی محکمہ تعمیرات عامہ (PWD) کو تمام سڑکوں کی مناسب دیکھ بھال یقینی بنانے کی ہدایت دی۔میاں الطاف نے ضعیف العمر، بیواؤں، اور ریاستی شادی امداد اسکیم (SMAS) کے مستفیدین کے لئے پنشن اسکیموں کے تحت فوائد کی بروقت تقسیم پر زور دیا۔میٹنگ میں ڈی ڈی سی چیئرپرسن ایڈووکیٹ نسیم لیاقت، ایم ایل اے راجوری افتخار احمد، ایم ایل اے بدھل جاوید اقبال چودھری، ایم ایل اے کالا کوٹ ٹھاکر رندھیر سنگھ، اور ایم ایل اے تھنہ منڈی مظفر خان نے بھی شرکت کی۔اس موقع پر ضلع کے کئی سینئر افسران بھی موجود تھے، جن میں اے ڈی ڈی سی ڈاکٹر راج کمار تھاپا، اے ڈی سی کالا کوٹ تنویر احمد، اے ڈی سی کوٹرنکہ دل میر، اے ڈی سی سندر بنی رام کیش شرما، اے ڈی سی راجوری چندر پرکاش، اے سی آر محمد جہانگیر خان، ایس ڈی ایم تھنہ منڈی عابد حسین، سی پی او مقصود احمد، اے سی پی شیراز احمد اور دیگر محکموں کے افسران شامل تھے۔
