عشرت حسین بٹ
پونچھ// جمعرات کو پونچھ کے چکن دا باغ کراسنگ پوائنٹ پر لائن آف کنٹرول (ایل او سی) کے قریب بھارت اور پاکستان کے درمیان بریگیڈیئر سطح کی فلیگ میٹنگ منعقد ہوئی۔ اس میٹنگ میں حالیہ سرحدی کشیدگی، بلا اشتعال فائرنگ اور جنگ بندی کی خلاف ورزیوں پر تبادلہ خیال کیا گیا۔ذرائع کے مطابق میٹنگ خوشگوار ماحول میں ہوئی، جس میں دونوں فریقین نے ایل او سی پر امن و ہم آہنگی برقرار رکھنے اور جنگ بندی معاہدے کی مکمل پاسداری پر اتفاق کیا۔ دفاعی ترجمان کے مطابق،’یہ فلیگ میٹنگ لائن آف کنٹرول اور سرحدی نظم و نسق کے معمول کے عمل کا حصہ ہے، جو دونوں ممالک کے ڈی جی ایم اوز کی باہمی سمجھ کے تحت منعقد ہوتی ہے‘۔سرکاری ذرائع نے بتایا کہ بھارتی افواج نے اس موقع پر پاکستانی ہم منصبوں کے ساتھ دراندازی کی کوششوں، آئی ای ڈی دھماکوں، اور جنگ بندی کی خلاف ورزیوں جیسے سنگین امور پر باضابطہ احتجاج بھی درج کیا۔قابل ذکر ہے کہ اس سے قبل 2 اپریل کو بھی چکن دا باغ کراسنگ پوائنٹ پر 75 منٹ تک جاری رہنے والی فلیگ میٹنگ منعقد ہوئی تھی، جس میں دونوں فریقین نے لائن آف کنٹرول پر امن قائم رکھنے پر زور دیا تھا۔یاد رہے کہ یکم اپریل کو پونچھ میں ایک بارودی سرنگ کے دھماکے کے بعد پاکستانی افواج کی جانب سے بلا اشتعال فائرنگ کی گئی تھی، جسے جنگ بندی کی خلاف ورزی قرار دیا گیا۔ اس سے پہلے 13 فروری کو بھی پونچھ میں بھارتی چوکیوں پر فائرنگ کی گئی تھی، جبکہ 11 فروری کو اکھنور سیکٹر میں آئی ای ڈی دھماکے میں ایک کیپٹن سمیت دو بھارتی اہلکار شہید ہو گئے تھے۔
