سمت بھارگو
راجوری//وائٹ نائٹ کور کے جنرل آفیسر کمانڈنگ (جی او سی) لیفٹیننٹ جنرل نوین سچدیوا نے بدھ کے روز راجوری میں سیکورٹی صورتحال کا تفصیلی جائزہ لیا، خاص طور پر انسداد دہشت گردی آپریشنز کی پیش رفت پر غور کیا۔دو روز قبل، جی او سی وائٹ نائٹ کور نے ایس آف اسپیڈز ڈویژن کے ہیڈکوارٹر میں ایک اعلیٰ سطحی سیکورٹی میٹنگ کی صدارت کی تھی، جس میں ایس آف اسپیڈز ڈویژن، کاؤنٹر انسجنسی فورس (رومیو) اور کاؤنٹر انسجنسی فورس (ڈیلٹا) کے جی او سیز نے شرکت کی تھی۔بدھ کے روز، لیفٹیننٹ جنرل نوین سچدیوا نے راجوری میں کاؤنٹر انسجنسی فورس (رومیو) کے ہیڈکوارٹر کا دورہ کیا، جہاں انہوں نے راجوری، پونچھ اور ریاسی اضلاع میں سیکورٹی کی موجودہ صورتحال کا تفصیلی جائزہ لیا۔ یہ تینوں اضلاع رومیو فورس کی عملداری میں آتے ہیں، جہاں حالیہ دنوں میں انسداد دہشت گردی کارروائیاں جاری ہیں۔دورے کے دوران، لیفٹیننٹ جنرل سچدیوا نے دہشت گردی کے خلاف آپریشنز میں فوج کی کوششوں اور عزم کو سراہا۔ انہوں نے فوجی جوانوں کی انتھک محنت اور غیر متزلزل لگن کی تعریف کرتے ہوئے کہا کہ سیکیورٹی فورسز کی قربانیاں اور پیشہ ورانہ مہارت دہشت گردوں کے خلاف ہماری کامیابیوں میں کلیدی کردار ادا کر رہی ہیں۔اجلاس میں خطے میں موجودہ چیلنجز، انسداد دہشت گردی کی حکمت عملی، انٹیلی جنس نظام کو مضبوط کرنے اور عوامی تعاون کے ساتھ سیکیورٹی اقدامات کو مزید مؤثر بنانے پر بھی تبادلہ خیال کیا گیا۔ذرائع کا کہنا ہے کہ جی او سی نے افواج کو ہدایت دی کہ وہ کسی بھی ممکنہ خطرے کے پیش نظر چوکس رہیں اور عوام کے تحفظ کو اولین ترجیح دیں۔سیکورٹی جائزے کے دوران، مقامی آبادی کے ساتھ تعلقات کو مزید مضبوط بنانے پر بھی غور کیا گیا۔ ذرائع کے مطابق، فوجی قیادت نے عوام کو یقین دلایا کہ علاقے میں امن و امان کے قیام کے لیے ہر ممکن اقدامات کیے جا رہے ہیں اور دشمن عناصر کو شکست دینے میں کوئی کسر نہیں چھوڑی جائے گی۔فوج کے اعلیٰ حکام کا کہنا ہے کہ راجوری، پونچھ اور ریاسی میں دہشت گردی کے خلاف مہم میں مزید تیزی لائی جائے گی۔ ممکنہ خطرات کا اندازہ لگاتے ہوئے حساس علاقوں میں آپریشنز اور سرچ مہم کو مزید مضبوط کیا جا سکتا ہے۔خطے میں حالیہ دہشت گردی کے واقعات کے بعد یہ سیکورٹی جائزہ دورہ انتہائی اہمیت کا حامل سمجھا جا رہا ہے۔
