یو این آئی
نئی دہلی//صدر دروپدی مرمو نے مختلف بحری خدمات کے حکام پر زور دیا ہے کہ وہ بڑھتی ہوئی عالمی جغرافیائی سیاسی کشیدگی کے درمیان جدید ٹیکنالوجی کی مدد سے لاجسٹک مینجمنٹ کو موثر بنائیں۔ مرمو نے پیر کو یہاں راشٹرپتی بھون میں انڈین نیول میٹریل مینجمنٹ سروس اور انڈین نیول آرمامنٹ سروس کے ٹرینی افسران سے ملاقات کی۔اس موقع پر صدر مملکت نے کہا کہ بڑھتی ہوئی عالمی جغرافیائی سیاسی کشیدگی کے دور میں ممالک بحری تعاون میں اضافہ کر رہے ہیں اور مشترکہ مشقیں کر رہے ہیں۔ انہوں نے کہا کہ عالمی سطح پر ہندوستان کے ایک بڑے کردار کو سنبھالنے کے ساتھ نیول میٹریل مینجمنٹ سروس اور نیول آرمامنٹ سروس کے افسران جدید ٹیکنالوجی کا فائدہ اٹھاتے ہوئے موثر لاجسٹکس مینجمنٹ کے ذریعے ہندوستانی بحریہ کی خدمت میں اہم کردار ادا کرتے ہیں۔صدر نے عہدیداروں کو مشورہ دیا کہ وہ دنیا بھر میں ہونے والی جدید ترین تکنیکی ترقی کے بارے میں خود کو اپ ڈیٹ رکھیں۔ انہوں نے عہدیداروں سے کہا کہ وہ مواد کے نظم و نسق اور خدمات کی فراہمی کے نظام کو ہموار اور موثر بنانے کے لئے نئے طریقے اپنائیں ۔ انہوں نے افسران پر زور دیا کہ وہ اپنے آپ کو قوم اور ہندوستانی بحریہ کی خدمت کے لیے وقف کریں۔ صدر جمہوریہ نے اس اعتماد کا اظہار کیا کہ وہ ہندوستانی بحریہ کو بہترین خدمات فراہم کرکے قوم کی تعمیر میں اپنا حصہ ڈالیں گے۔
