یواین آئی
نئی دہلی//امور داخلہ اور امدادِ باہمی کے مرکزی وزیر امت شاہ نے نئی دہلی میں منی پور کی سیکورٹی صورتحال پر ایک اعلی سطحی جائزہ میٹنگ کی صدارت کی۔میٹنگ میں منی پور کے گورنر، مرکزی داخلہ سکریٹری، انٹیلی جنس بیورو کے ڈائریکٹر، آرمی کے ڈپٹی چیف، ایسٹرن کمانڈ کے آرمی کمانڈر، بارڈر سیکورٹی فورس(بی ایس ایف)کے ڈائریکٹر جنرل، سینٹرل ریزرو پولیس فورس (سی آر پی ایف)اور آسام رائفلز، سلامتی مشیر ، منی پور اور فوج کے اعلی افسران نے شرکت کی۔میٹنگ کے دوران، امورِ داخلہ اور امدادِ باہمی کے مرکزی وزیر امت شاہ نے کہا کہ حکومت ہند، وزیر اعظم نریندر مودی کی قیادت میں، منی پور میں دیرپا امن کی بحالی کے لیے پوری طرح پرعزم ہے اور اس سلسلے میں تمام تر ضروری مدد فراہم کر رہی ہے۔مرکزی وزیر داخلہ امت شاہ نے ہدایت دی کہ 8 مارچ 2025 سے منی پور کی تمام سڑکوں پر لوگوں کے لیے آزادانہ نقل و حرکت کو یقینی بنایا جائے۔ انہوں نے یہ بھی ہدایت دی کہ جو بھی رکاوٹیں پیدا کرنے کی کوشش کرے اس کے خلاف سخت کارروائی کی جائے۔امت شاہ نے ہدایت دی کہ منی پور کی بین الاقوامی سرحد کے ساتھ متعین کردہ داخلی مقامات کے دونوں جانب باڑ لگانے کا کام جلد از جلد مکمل کیا جائے۔ انہوں نے کہا کہ منی پور کو منشیات سے پاک بنانے کے لیے منشیات کے کاروبار میں ملوث پورے نیٹ ورک کو ختم کیا جانا چاہیے۔
