یواین آئی
لاہور/افغانستان کی کرکٹ ٹیم کے کپتان حشمت اللہ شاہدی نے اعتماد ظاہر کیا کہ ان کی ٹیم چیمپئنز ٹرافی کے اپنے اگلے مقابلے میں آسٹریلیا کو ہرا سکتی ہے ۔افغانستان کرکٹ ٹیم کے کپتان حشمت اللّٰہ شاہدی کا کہنا ہے کہ انگلینڈ کو ہرا سکتے ہیں تو آسٹریلیا کو بھی ہرا سکتے ہیں۔انہوں نے یہ بھی وضاحت کی کہ ٹیم صرف آسٹریلوی اسٹار گلین میکسویل پر نہیں بلکہ پوری آسٹریلیائی ٹیم کی منصوبہ بندی پر توجہ مرکوز کر رہی ہے ۔لاہور میں آسٹریلیا کے خلاف میچ سے قبل پریس کانفرنس کرتے ہوئے انہوں نے کہا کہ انگلینڈ کے خلاف جیت کے بعد کھلاڑی کا حوصلہ بلند ہے ، آسٹریلیا ایک مضبوط ٹیم ہے ، اور ان کے خلاف بہترین کارکردگی کا مظاہرہ کریں گے اور جیتنے کی کوشش کریں گے ۔حشمت اللّٰہ شاہدی کا کہنا ہے کہ آسٹریلیا کے خلاف جیت کر سیمی فائنل پہنچیں گے ، یہی ہدف ہے ، آسٹریلیا کے خلاف میچ میں سادہ پلان رکھیں گے ۔انہوں نے کہا کہ افغان فینز ہمیشہ سپورٹ کرتے ہیں، انگلینڈ کے خلاف بھی سپورٹ کیا، اُمید ہے کہ آسٹریلیا کے خلاف میچ میں بھی تماشائی آئیں گے ۔افغانستان کرکٹ ٹیم کے کپتان کا کہنا ہے کہ ہمارے پاس اسپنرز اچھے ہیں، اگر تھوڑی سی بھی مدد ملے تو ہم کسی کے خلاف بھی کامیاب ہو سکتے ہیں۔ان کا یہ بھی کہنا ہے کہ ماضی میں جو ہوا وہ تاریخ کا حصہ ہے ، اب ٹیم کی توجہ کل کے میچ پر مرکوز ہے ، آسٹریلیا کے خلاف ہم نے منصوبہ بندی تیار کی ہے اور اسی پر ہم عمل کریں گے ۔
