عظمیٰ ویب ڈیسک
نئی دہلی// دہلی اسمبلی انتخابات 2025 کے لیے ووٹنگ کے اختتام تک اوسطاً 57.86 فیصد ووٹروں نے اپنے حق رائے دہی کا استعمال کیا مجموعی طور پر قومی راجدھانی میں صبح سے ہی پرامن طور پر ووٹنگ ہوئی صدر دروپدی مرمو، وزیر خارجہ ڈاکٹر ایس جے شنکر، مرکزی وزیر ہردیپ سنگھ پوری، بی جے پی دہلی یونٹ کے صدر وریندر سچدیوا، وزیر اعلیٰ آتشی اور ان کے پیشرو اروند کیجریوال نے آج ای وی ایم کا بٹن دبایا۔ کانگریس کی سابق صدر سونیا گاندھی، لوک سبھا میں اپوزیشن لیڈر راہل گاندھی اور کانگریس جنرل سکریٹری پرینکا گاندھی واڈرا نے بھی اپنا ووٹ ڈالا۔ الیکشن کمشنر ڈاکٹر سکھبیر سنگھ سندھو، آرمی چیف جنرل اوپیندر دویدی، دہلی کے چیف الیکٹورل آفیسر وجے دیو اور دہلی پولیس کمشنر سنجے اروڑہ نے بھی اپنے جمہوری حقوق کا استعمال کیا۔
ووٹنگ کے دوران کالکاجی اسمبلی حلقہ کے ماڑی پور میں ایک پولنگ بوتھ پر وی وی پیٹ میں خرابی کی وجہ سے ووٹنگ کا عمل تقریباً 15 منٹ تک روک دیا گیا۔ کالکاجی اسمبلی سیٹ سے کانگریس امیدوار الکا لامبا نے اس پولنگ بوتھ پر اپنا ووٹ ڈالا۔ بھارتیہ جنتا پارٹی (بی جے پی) نے سیلم پور میں مسلم خواتین پر برقعہ پہن کر جعلی ووٹ ڈالنے کا الزام لگایا ہے۔ اس پر بی جے پی کارکنوں نے ہنگامہ کھڑا کردیا۔ اس کے علاوہ کہیں سے بھی کسی ناخوشگوار واقعے کی اطلاع نہیں ہے۔
دہلی پولیس نے عام آدمی پارٹی کے ایم ایل اے اور اوکھلا اسمبلی سے امیدوار امانت اللہ خان کے خلاف جامعہ نگر پولیس اسٹیشن میں ماڈل ضابطہ اخلاق کی خلاف ورزی کا مقدمہ درج کیا ہے۔
الیکشن کمیشن کی طرف سے جاری کردہ اعداد و شمار کے مطابق،رات 18.00 بجے ووٹنگ ختم ہونے تک، سب سے زیادہ ضلع وار ٹرن آؤٹ شمال مشرقی دہلی میں 63.83 فیصد رہا جبکہ جنوبی دہلی میں 53.77 فیصد ووٹروں نے ووٹ ڈالا۔ ضلع وار ووٹنگ کا تناسب اس طرح رہا:
ضلع…………………………… ووٹنگ فیصد (اوسط)
وسطی دہلی …………….55.81 فیصد
مشرقی دہلی …………….60.11 فیصد
نئی دہلی…………54.37 فیصد
شمالی دہلی …………………………..57.24 فیصد
شمال مشرقی دہلی ……………..63.83 فیصد
شمال مغربی دہلی…………58.05 فیصد
شاہدرہ……………………………61.35 فیصد
جنوبی دہلی ……………….55.72 فیصد
جنوب مشرقی دہلی…………53.77 فیصد
جنوب مغربی دہلی …………58.86 فیصد
مغربی دہلی …………….57.42 فیصد
مصطفی آباد سیٹ پر سب سے زیادہ ٹرن آؤٹ 66.68 فیصد جبکہ قرول باغ سیٹ پر سب سے کم 47.40 فیصد ٹرن آؤٹ ہوا۔
دہلی اسمبلی انتخابات میں بی جے پی، اے اے پی اور کانگریس کے درمیان سہ رخی مقابلہ ہے۔
منصفانہ اور ہموار ووٹنگ کے عمل کو یقینی بنانے کے لیے 30,000 سے زیادہ پولیس اہلکار اور نیم فوجی دستوں کی 220 کمپنیاں دہلی بھر میں تعینات کی گئی ہیں۔
دہلی اسمبلی انتخابات کے ساتھ ہی ملک کی دو ریاستوں میں دو اسمبلی سیٹوں پر ضمنی انتخابات کے لیے آج ووٹنگ ہوئی۔ 17.00 بجے تک تمل ناڈو کی ایروڈ (مشرقی) اسمبلی سیٹ کے لیے 64.02 فیصد اور اتر پردیش کی ملکی پور اسمبلی سیٹ کے لیے 65.35 فیصد ووٹنگ ریکارڈ کی گئی۔
