یو این آئی
گالے /سری لنکا کے بلے باز دیموتھ کرونارتنے اس ہفتے گالے میں آسٹریلیا کے خلاف اپنا 100 واں میچ کھیلنے کے بعد ٹیسٹ کرکٹ سے ریٹائر ہو جائیں گے ۔آسٹریلیا کے خلاف ٹیسٹ سیریز میں کرونارتنے کی کارکردگی اچھی نہیں رہی ہے ۔ 36 سالہ کرونارتنے کو گزشتہ 14 مہینوں میں رنز بنانے کے لئے جدو جہد کرتے دیکھا گیا۔ سال 2024 کے آغاز سے اب تک ان کا اوسط 27.05 ہے ۔ سری لنکا آسٹریلیا کے خلاف دو میچوں میں 0-1 سے پیچھے ہے ۔ اپنا 100 واں ٹیسٹ کھیل کر وہ سنتھ جے سوریا، متھیا مرلی دھرن، چمنڈا واس، مہیلا جے وردھنے ، کمار سنگاکارا اور اینجلو میتھیوز کے بعد یہ کارنامہ انجام دینے والے ساتویں سری لنکن کرکٹر بھی بن جائیں گے ۔کرونارتنے نے کہا کہ ‘‘یہ ریٹائر ہونے کا صحیح وقت ہے کیونکہ اگلے ڈبلیو ٹی سی مرحلے میں تین یا چار نوجوان کھلاڑی آ سکتے ہیں۔ یہ میچ گالے میں ہونے جا رہا ہے ، جہاں میں نے اپنا ڈیبیو کیا تھا، اس لیے وہاں کھیل ختم کرنا اچھا رہے گا۔انہوں نے کہا کہ آسٹریلیا کے خلاف پہلا ٹیسٹ ختم ہونے کے بعد میں نے ایس ایل سی سے کہا کہ اگلا ٹیسٹ میرا آخری ٹیسٹ ہوگا۔کرونارتنے نے اپنا ٹیسٹ ڈیبیو نومبر 2012 میں نیوزی لینڈ کے خلاف اسی میدان پر کیا جہاں سے وہ اب ریٹائر ہونے والے ہیں۔ انہیں 2014 میں تھوڑی دیر کے لیے ٹیم سے ڈراپ کر دیا گیا تھا، لیکن اس سال کے آخر میں وہ اپنی پہلی ٹیسٹ سنچری بنانے کے لیے واپس آئے ۔ انہوں نے ٹیسٹ میں 34 نصف سنچریاں اور 16 سنچریاں اسکور کیں۔ انہوں نے اپنے 12 سالہ ٹیسٹ کیریئر میں 39.99 کی اوسط سے 7079 رن بنائے ہیں۔اس کے علاوہ انہوں نے 50 ون ڈے میچوں میں 1316 رن بنائے ہیں۔ اس دوران انہوں نے ایک سنچری اور 11 نصف سنچریاں اسکور کیں۔
