یو این آئی
نئی دہلی//سابق رکن پارلیمنٹ ادت راج کی قیادت میں کانگریس کارکنوں نے اتوار کو عام آدمی پارٹی کے قومی کنوینر اروند کیجریوال کے گھر کے باہر احتجاج کیا اور پنجاب کے امرتسر میں بابا صاحب ڈاکٹر بھیم رائو امبیڈکر کے مجسمہ توڑے جانے کو لے کر ان سے معافی مانگنے کا مطالبہ کیا۔اس دوران ادت راج نے کہاکیجریوال کو ڈاکٹر امبیڈکر کا احترام کرنا سیکھنا چاہئے۔ امرتسر میں ڈاکٹر امبیڈکر کے مجسمہ کو توڑا گیا ہے۔ وہاں ان کی حکومت ہے۔ میں یہاں کوئی رکاوٹ پیدا کرنے نہیں آیا ہوں۔ ہمارا کوئی سیاسی مقصد نہیں ہے۔ میں یہاں صرف انہیں بابا صاحب امبیڈکر کا مجسمہ تحفے میں دینے آیا ہوں۔انہیں امرتسر میں ریاست کی توہین کیلئے معافی مانگنی چاہئے۔کانگریس کارکنوں کے احتجاج کے پیش نظر پولیس نے کیجریوال کے گھر کے سامنے سیکورٹی بڑھا دی ہے۔ پولیس نے مظاہرین کو روکنے کیلئے رکاوٹیں کھڑی کر دی ہیں۔
قابل ذکر ہے کہ 26جنوری کو سوشل میڈیا پر ایک ویڈیو سامنے آیا تھا جس میں ایک شخص کو پنجاب کے امرتسر میں سیڑھی کا استعمال کرتے ہوئے بابا صاحب امبیڈکر کے مجسمے پر چڑھتے اور ہتھوڑے سے اسے نقصان پہنچاتے ہوئے دیکھا گیا تھا۔ کانگریس اور بھارتیہ جنتا پارٹی (بی جے پی) نے اس واقعہ پر عام آدمی پارٹی، پنجاب حکومت اور مسٹر کیجریوال پر سخت تنقید کی تھی۔
