یواین آئی
نئی دہلی// وزیر اعظم نریندر مودی نے نیتا جی سبھاش چندر بوس کو ان کے یوم پیدائش پر خراج عقیدت پیش کرتے ہوئے ملک کے نوجوانوں سے کہا کہ وہ ترقی یافتہ ہندوستان کی تعمیر کے لئے آرام کی تلاش سے دور رہیں اور محنت اور کارکردگی پر توجہ دیں۔
نیتا جی کے یوم پیدائش پر اوڈیشہ کے کٹک میں منعقدہ پراکرم دیوس پروگرام سے خطاب کرتے ہوئے مودی نے ویڈیو لنک کے ذریعے کہا کہ آج جب ہمارا ملک ترقی یافتہ ہندوستان کے عزم کو حاصل کرنے میں مصروف ہے، ہمیں نیتا جی سبھاش چندر بوس کی زندگی سے مسلسل ترغیب ملتی ہے۔ نیتا جی کی زندگی کا سب سے بڑا مقصد تھا ۔ آزاد ہند۔ اپنے عزم کو پورا کرنے کے لیے انھوں نے اپنے فیصلے کو صرف ایک کسوٹی پر آزمایا۔وزیر اعظم نے کہا ”نیتا جی ایک خوشحال گھرانے میں پیدا ہوئے، انہوں نے سیول سروسز کا امتحان پاس کیا۔ وہ برطانوی راج میں اعلیٰ افسر بن کر آرام دہ زندگی گزارنا چاہتے تھے، لیکن انہوں نے آزادی کے لیے مشکلات کا انتخاب کیا، چیلنجز کا انتخاب کیا، ملک و بیرون ملک گھومنے کو ترجیح دی، نیتا جی سبھاش کمفرٹ زون کے پابند نہیں تھے۔ اسی طرح آج ہم سب کو ایک ترقی یافتہ ہندوستان کی تعمیر کے لیے اپنے کمفرٹ زون سے باہر آنا ہوگا۔ ہمیں خود کو عالمی سطح پر بہترین بنانا ہے، عمدگی کا انتخاب کرنا ہے، کارکردگی پر توجہ مرکوز کرنی ہے۔انہوں نے کہا کہ نیتا جی نے ملک کی آزادی کے لیے آزاد ہند فوج بنائی، اس میں ملک کے ہر طبقے کے بہادر مرد و خواتین شامل تھے۔ سب کی زبانیں الگ الگ تھیں لیکن احساس ایک تھا ملک کی آزادی۔ یہ اتحاد آج ترقی یافتہ ہندوستان کے لیے بھی ایک بڑا سبق ہے۔ تب ہمیں سوراج کے لیے متحد ہونا تھا، آج ہمیں ترقی یافتہ ہندوستان کے لیے متحد رہنا ہے۔ مودی نے کہا ”آج دنیا میں ہر جگہ ہندوستان کی ترقی کے لیے ملک میں سازگار ماحول ہے۔ دنیا ہندوستان کی طرف دیکھ رہی ہے کہ ہم اس 21ویں صدی کو ہندوستان کی صدی کیسے بناتے ہیں اور ایسے اہم دور میں ہمیں نیتا جی سبھاش کی تحریک سے ہندوستان کے اتحاد پر زور دینا ہے۔ ہمیں ان لوگوں سے بھی ہوشیار رہنا ہوگا جو ملک کو کمزور کرنا چاہتے ہیں، جو ملک کی وحدت کو پارہ پارہ کرنا چاہتے ہیں۔اوزیراعظم نے کہا ”نیتا جی سبھاش کو ہندوستان کی وراثت پر بہت فخر تھا۔ وہ اکثر ہندوستان کی بھرپور جمہوری تاریخ کے بارے میں بات کرتے تھے اور اس سے تحریک حاصل کرتے تھے۔ آج ہندوستان غلامی کی ذہنیت سے نکل رہا ہے۔ اپنی وراثت پر ہمیں فخر ہے۔ میں خوش قسمت ہوں کہ مجھے آزاد ہند حکومت کے 75 سال مکمل ہونے پر لال قلعہ پر ترنگا لہرانے کا موقع ملا۔ میں اس تاریخی موقع کو کبھی نہیں بھول سکتا۔ نیتا جی کی وراثت سے تحریک لیتے ہوئے ہماری حکومت نے 2019 میں دہلی کے لال قلعے میں نیتا جی سبھاش کو وقف ایک میوزیم بنایا۔ اسی سال سبھاش چندر بوس ڈیزاسٹر مینجمنٹ ایوارڈز کا آغاز کیا گیا۔ 2021 میں حکومت نے فیصلہ کیا کہ نیتا جی کے یوم پیدائش کو اب پراکرم دیوس کے طور پر منایا جائے گا۔ انڈیا گیٹ کے قریب نیتا جی کا ایک بہت بڑا مجسمہ نصب کرنا، انڈمان میں جزیرے کا نام نیتا جی کے نام پر رکھنا، یوم جمہوریہ کی پریڈ میں آئی این اے کے سپاہیوں کو سلام کرنا، حکومت کے اس جذبے کی علامت ہیں۔
