عظمیٰ نیوز سروس
سرینگر// وادی کشمیر کے اونچے علاقوں بشمول گلمرگ اور سونمرگ میں رات بھر تازہ برف باری ہوئی۔سرینگر میں موسمیاتی مرکز نے اگلے 48 گھنٹوں کے دوران کہیں ہلکی سے درمیانی بارش اور برف باری کی پیش گوئی کی ہے۔22 جنوری کو جموں کے میدانی علاقوں میں ہلکی سے اعتدال پسند بارش کی توقع ہے، جب کہ وادی چناب کی اونچائی اور پیر پنجال رینج میں ہلکی سے درمیانی برف باری کا امکان ہے۔میدانی علاقوں میں ہلکی سے اعتدال پسند بارش اور جموں و کشمیر کے مختلف علاقوں میں 23 جنوری کو برفباری ہوسکتی ہے۔24 سے 28 جنوری تک موسم زیادہ تر خشک رہے گا۔ تاہم 29 جنوری سے 31 جنوری کے درمیان الگ تھلگ مقامات پر ہلکی بارش اور برفباری کا ہلکا امکان ہے۔ادھر گلمرگ سمیت وادی کشمیر کے اونچے علاقوں میں 9 ملی میٹر برف باری ہوئی، جب کہ سونمرگ میں بھی رات بھر ہلکی برف باری ہوئی، جس سے وہاں ٹھہرے ہوئے سیاحوں کو بہت خوشی ہوئی۔کنگن سے غلام نبی رینہ کے مطابق سونمرگ، زوجیلا، گگن گیر، منی مرگ اور دراس میں تازہ برفباری ہوئی جبکہ کلن ،گنڈ اورکنگن میں ہلکی بارشیں ہوئی ، جس کے باعث سرینگر لداخ شاہراہ پر ٹریفک کی آمدورفت احتیاطی طور پر بند کردی گئی ۔ زوجیلا میں 6انچ،سونمرگ 4انچ اورگگن گیر میں 3انچ برف ریکارڈ کی گئی۔ کشمیر کے کئی دیگرعلاقوں میں رات بھر بارش ہوئی۔شمالی کشمیر میں رازدان پاس پر تازہ برف باری کے بعد گریز-بانڈی پورہ سڑک پر گاڑیوں کی آمدورفت معطل ہے۔دریں اثنا، وادی کے تمام موسمی مراکز میں رات کا درجہ حرارت بڑھ گیا ۔سرینگر میں 1.0 ، گلمرگ میںمنفی 3.2 پر طے ہوا۔ پہلگام میں منفی2.2 ، قاضی گنڈ میںمنفی1.6 ،،کپوارہ میںمیں 1 ڈگری جبکہ کوکرناگ میں منفی1.4 درجہ حرارت ریکارڈ کیا گیا۔
