یوم جمہوریہ کے پیش نظر جموں و کشمیر میں سکیورٹی کے غیر معمولی انتظامات

سرینگر// یوم جمہوریہ کے پیش نظرجموں و کشمیر کے کئی علاقوں میں اتوار کے روز سیکورٹی فورسز نے راہگیروں، موٹر سائیکل سواروں کی تلاشی لی، جس دوران ان کے شناختی کارڈ باریک بینی سے چیک کئے جا رہے تھے۔
جموں میں مولانا آزاد اسٹیڈیم کو سیکورٹی فورسز نے پوری طرح سے سیل کیا اور کسی کو بھی بغیر تلاشی اندر جانے کی اجازت نہیں دی جارہی ہے۔
اطلاعات کے مطابق یوم جمہوریہ کے پیش نظر سری نگر سمیت وادی کے دیگر اضلاع میں سیکورٹی کے غیر معمولی انتظامات کئے گئے ہیں۔
ذرائع نے بتایا کہ اتوار کے روز جنوبی ، شمالی اور وسطی کشمیر کے کئی علاقوں میں ناکہ چیکنگ کے دوران مسافروں، راہگیروں، اور سکوٹی سواروں کی باریک بینی سے تلاشی لی جارہی تھی۔معلوم ہوا ہے کہ سکیورٹی فورسز نے اہم شاہراوں اور چوراہوں پر ناکے لگائے ہیں جہاں پر کسی بھی گاڑی کو بغیر تلاشی کے آگے جانے کی اجازت نہیں دی جارہی ہے۔جنوبی کشمیر میں کئی مقامات پر عارضی چیک پوائنٹس قائم کئے گئے ہیں جہاں نہ صرف گاڑیوں کو روک کر ان کی تلاشی لی جاتی ہے بلکہ مسافروں کے شناختی کارڈ بھی چیک کئے جاتے ہیں۔ذرائع کے مطابق سماج دشمن عناصر کے منصوبوں کو ناکام بنانے کی خاطر جنوبی کشمیر میں جگہ جگہ سکیورٹی فورسز کی تعیناتی عمل میں لائی گئی ہے۔
دریں اثنا سرینگر جموں شاہراہ پر بھی سکیورٹی کے پختہ انتظامات کئے گئے ہیں۔ذرائع نے بتایا کہ سرینگر سے جموں کی طرف جانے والی گاڑیوں کی باریک بینی سے تلاشی لی جارہی ہیں
ذرائع کے مطابق یوم جمہوریہ کی تقریبات کو خوش اسلوبی کے ساتھ پایہ تکمیل تک پہنچانے کی خاطر جموں وکشمیر میں سکیورٹی کے پختہ انتظامات کئے گئے ہیں۔
واضح رہے کہ جموں و کشمیر میں یوم جموریہ کی سب سے بڑی تقریب جموں کے مولانا آزاد اسٹیڈیم میں منعقد ہوگی جہاں پر جموں و کشمیر کے ایل جی منوج سنہا مارچ پاسٹ پر سلامی لیں گے۔ وہیں کشمیر میں سب سے بڑی تقریب بخشی سٹیڈیم میں منعقد ہوگی، جہاں نائب وزیر اعلیٰ سریندر چودھری سلامی لیں گے۔