راجوری میں پراسرار اموات کی تحقیقات کیلئے ایس آئی ٹی تشکیل

راجوری// ضلع راجوری کے ایک دور افتادہ گاؤں میں تین خاندانوں سے تعلق رکھنے والے 14 افراد، جن میں 11 بچے شامل ہیں، کی پراسرار اموات کی تحقیقات کے لیے پولیس نے خصوصی تحقیقاتی ٹیم (ایس آئی ٹی) تشکیل دی ہے۔
بڈھال گاؤں میں گزشتہ ایک ماہ کے دوران ہونے والی ان پراسرار اموات پر عوامی تشویش کے درمیان انتظامیہ نے متعلقہ اداروں کو ہدایت دی ہے کہ وہ رپورٹس کا تجزیہ کریں تاکہ ان اموات کی وجوہات معلوم کی جا سکیں۔
ابتدائی رپورٹس میں ہلاک شدگان کے نمونوں میں مخصوص نیوروٹوکسنز کی موجودگی کی نشاندہی کی گئی ہے، جن پر مزید تحقیقات جاری ہیں تاکہ ان ہلاکتوں کی اصل وجہ کا پتہ لگایا جا سکے۔
سینئر سپرنٹنڈنٹ پولیس راجوری، گورو سکاروار کے حکم کے مطابق، ان اموات کی حساسیت کو مدنظر رکھتے ہوئے 11 رکنی خصوصی تحقیقاتی ٹیم تشکیل دی گئی ہے، جس کی قیادت سپرنٹنڈنٹ پولیس (آپریشنز) بدھل، وجاہت حسین کریں گے۔
کانڈی پولیس سٹیشن میں 7، 12 اور 23 دسمبر اور 12 جنوری کو درج چار ڈیلی ڈائری رپورٹس (ڈی ڈی آرز) کے مطابق، کل 14 افراد، جن میں ایک مرد اور اس کے چار بچے، ایک خاتون اور اس کے تین بچے، اور ایک مرد اور اس کے چار پوتے شامل ہیں، مشکوک حالات میں ہلاک ہوئے۔
ایس آئی ٹی میں ڈپٹی سپرنٹنڈنٹ پولیس کانڈی وکرم سرمال، ایس ایچ او کانڈی ابرار خان، ایس ایچ او ویمن پولیس سٹیشن راجوری سشما ٹھاکر، انسپکٹر راجیو کمار، سب انسپکٹر پنکج شرما اور اسسٹنٹ سب انسپکٹر پون شرما شامل ہیں۔
اس کے علاوہ ٹیم میں فارنسک میڈیسن اور ٹاکسیکولوجی، مائیکروبائیولوجی، پیڈیاٹرکس اور پیتھالوجی ڈیپارٹمنٹس کے ماہرین بھی شامل کیے گئے ہیں۔
حکم نامے کے مطابق، ایس آئی ٹی انچارج فوڈ سیفٹی، زراعت، جل شکتی (پبلک ہیلتھ انجینئرنگ) محکموں اور جموں کی فارنسک سائنس لیبارٹری (ایف ایس ایل) ٹیم کے ماہرین کی خدمات بھی حاصل کریں گے۔
ٹیم کو ہدایت دی گئی ہے کہ وہ اپنی تحقیقات کی پیش رفت سے ہر ہفتے ضلعی پولیس دفتر کو آگاہ کرے۔